बेळगावात पुन्हा गॅस गळती ; पण कोणतीही जीवितहानी नाही

बेळगाव : बेळगाव शहरात पुन्हा एकदा गॅस गळतीची घटना घडली आहे. बॉक्‍साईट रोडवरील बसव कॉलनी येथे गॅस गळती झाल्याची माहिती मेगा गॅस कंपनीकडून देण्यात आली. यावेळीही स्मार्ट सिटी योजनेतील कामामुळेच गॅसवाहीनीचे नुकसान झाले व गळती लागल्याची माहितीही मिळाली आहे. गळतीची माहिती बसव कॉलनीतील रहिवाशांनी थेट अग्नीशमन विभागाला दिली, त्यामुळे अग्नीशमन विभागाचे जवान थेट घटनास्थळी पोहोचले. पण मुख्य गॅसवाहीनीला गळती लागली नसल्याचे जवानांच्या निदर्शनास आले. 

हेही वाचा - शिक्षक संघटनेची निवडणूक 24 नोव्हेंबरला ?

मुख्य गॅसवाहीनीतून घरगुती जोडणीसाठी जी लहान वाहीनी घालण्यात आली आहे, त्या वाहीनीचे नुकसान झाल्याचे निदर्शनास आले. त्याची माहिती मेगा गॅस कंपनीलाही देण्यात आली. कंपनीच्या प्रतिनिधीनी तेथे जावून ती गळती बंद केली. स्मार्ट सिटी योजनेतून तेथे भुयारी गटारीचे काम हाती घेण्यात आले आहे. ते काम सुरू असताना वाहीनीचे नुकसान झाले. या घटनेत फारसे नुकसान झाले नाही अशी माहितीही मेगा गॅस कंपनीकडून देण्यात आली. 

गेल्या तीन महिन्यात शहरात अनेक ठिकाणी गॅसवाहीनीला गळती लागली आहे. विशेष म्हणजे त्या प्रत्येकवेळी मुख्य गॅसवाहीनीलाच गळती लागल्यामुळे मेगा गॅस कंपनीचे मोठे नुकसान झाले आहे. शिवाय वेळेत गळती काढल्यामुळे संभाव्या धोकाही टळला आहे. प्रत्येक गळतीला स्मार्ट सिटी योजनेचे काम कारणीभूत ठरल्यामुळे मेगा गॅस कंपनीने यासंदर्भात कायदेशीर कारवाई करण्याचा निर्णयही घेतला होता. त्यांनी स्मार्ट सिटी योजनेचे व्यवस्थापकीय संचालक शशीधर कुरेर यांच्याकडे याबाबत तक्रारही केली होती. 

हेही वाचा -  परिवहन मंत्र्यांच्या गावचं बसस्थानक मॉडर्न कधी होणार? 

 पण गॅसवाहीनीची योजना हा स्मार्ट सिटी योजनेचाच भाग असल्याचे सांगून कुरेर यांनी मेगा कंपनीला गप्प बसविले. त्यामुळे आता कंपनीने आता तक्रार करणेही बंद केले आहे. पण गॅस गळतीचे सत्र अजूनही बंद झालेले नाही. मेगा गॅस कंपनीकडून मुख्य गॅस वाहीनी घालण्याचे काम जवळपास पूर्ण झाले आहे. शहरात अनेक निवासी भागात गॅस जोडण्याही देण्यात आल्या आहेत. पण गळतीच्या समस्येमुळे मेगा गॅस कंपनी हवालदिल झाली आहे.

संपादन - स्नेहल कदम