लॉकडाऊनमध्येही सुरू होतं दारूचं गुऱ्हाळ, सासू-सून ताब्यात

राशीन : आखोणी (ता. कर्जत) शिवारात राशीन पोलिसांनी काल दुपारी गावठी दारूच्या भट्टीवर छापा टाकून चारशे लिटर कच्च्या दारूचे रसायन उद्‌ध्वस्त केले. पोलिसांनी सासू-सुनेस ताब्यात घेतले आहे. यातील मुख्य आरोपी पळून गेला.

आखोणी शिवारात काटेरी झुडपांच्या आडोशाला गावठी दारू काढली जात असल्याचे पोलिसांना समजले. सहायक पोलिस निरीक्षक सुरेश माने, पोलिस कॉन्स्टेबल गणेश ठोंबरे, पांडुरंग वीर, संपत शिंदे, निशिगंधा भिसे यांच्या पथकाने शनिवारी दुपारी छापा टाकला. त्यात त्यांनी चारशे लिटर कच्ची दारू असलेले पिंप आणि त्याच्या बाजूला असलेली दारू गाळण्याची भट्टी उद्‌ध्वस्त केली.

हेही वाचा - अकबरनगरमधील प्रार्थनास्थळात लपले होते तेराजण

यातील मुख्य आरोपी संतोष काळे पळून गेला, तर त्याची आई रुबिना आणि पत्नी मंदाकिनी या दोघींना पोलिसांनी ताब्यात घेतले आहे. या छाप्यात एक मोटरसायकल, वीजपंप, दहा लिटर दारू, नवसागर, सडका गूळ यांसह बावीस हजार पाचशे रुपयांचा मुद्देमाल जप्त केला. 

कोरोनामुळे लॉकडाऊन असल्याने सर्व दुकाने बंद आहेत. त्यामुळे व्यसन करणाऱ्यांना दारू मिळत नाही. त्यामुळे काही लोकांनी हातभट्टीची दारू गाळायचा धंदा जोरात सुरू केला आहे. अव्वाच्या सव्वा पैसे देऊनही दारू मिळत नसल्याने या हातभट्टीच्या दारूला बरकत आली आहे. त्यातून हा धंदा करणारे गावोगाव फोफावले आहेत. पोलिस त्यांच्यावर पाळत ठेवून कारवाई करीत आहेत. मात्र, गावोगाव दारूच्या भट्ट्या चोरी-छुपके सुरू आहेत.