म्हैसाळ हत्याकांड : मांत्रिकाच्या घरावर सोलापूर येथे छापे

सांगली - म्हैसाळ (ता. मिरज) येथील हत्याकांडप्रकरणी मांत्रिक अब्बास महंमदअली बागवान (सोलापूर) याला काल रुग्णालयातून अटक केली. आज पोलिसांनी त्याच्या सोलापूर येथील घरावर छापे मारले. तसेच दुसरा त्याचा साथीदार धीरज चंद्रकांत सुरवसे याच्या घरावरही छापे टाकण्यात आले. मांत्रिकाच्या घरातून काही महत्त्वाची कागदपत्रे ताब्यात घेतल्याचे समजते आहे. वनमोर कुटुंबीयांकडून किती पैसे घेतले, याचा लवकरच खुलासा केला जाईल, असे सूत्रांनी सांगितले.

अधिक माहिती अशी, की म्हैसाळ येथील डॉ. माणिक यल्लाप्पा वनमोरे व पोपट यल्लाप्पा वनमोरे या दोघा भावांच्या कुटुंबातील नऊ जणांचा मृत्यू झाल्याचे २० जून रोजी उघडकीस आले होते. अटकेतील बागवान हा मांत्रिक आहे. त्याने वनमोरे बंधूंकडून गुप्तधनाचा शोध घेण्यास मदत करण्याच्या बहाण्याने मोठी रक्कम घेतली होती. खजिन्याबाबत दिलेले आश्‍वासन पूर्ण न झाल्याने वनमोरे यांनी पैशासाठी तगादा लावला होता. यातूनच मांत्रिक बागवान व साथीदार सुरवसे या दोघांनी १९ जूनच्या रोजी गुप्तधनाचे कारण पुढे आणले. ‘वेळ आलीय,’ असे सांगून प्रत्येकाला बोलावून घेत काळा चहा दिला. यातूनच विषप्रयोग झाल्याचे तपासात समोर आले.

मांत्रिक बागवान याला काल पोलिसांनी रुग्णालयातून अटक केली. पोलिस कोठडीत प्राथमिक चौकशी करण्यात आली. घटनाक्रमाचा त्यांने उलगडा केला. आज पोलिस उपाधीक्षक अशोक वीरकर यांच्यासह पथकाने सोलापूर येथील घरावर छापे टाकले. यावेळी संशयित मांत्रिक यासही त्याठिकाणी नेत ओळख परेड करण्यात आली. घरातून काही महत्त्वाची कागदपत्रे ताब्यात घेतल्याचे समजते आहे. तसेच वनमोरेंकडून किती पैसे घेतले होते, याचा लवकरच खुलासा होईल, असे सांगण्यात आले.