राजकारण : ‘येथे’ पक्षनेतेपदाच्या नावातच बदल

मंगळवेढा (सोलापूर) : सत्ता स्थापनेत राज्यात झालेल्या नाट्यमय घडामोडींची पुनरावृत्ती नगरपालिकेच्या विषय समितीच्या निवडणुकीत येथे दिसून आली. विद्यमान पक्षनेते पांडुरंग नाईकवडी यांच्याऐवजी अजित जगताप यांची निवड झाल्याची माहिती विषय समितीच्या निवडी दरम्यान उघड झाल्यामुळे खळबळ उडाली. 

हेही वाचा - शिक्षक सघांची महामंडळ कोल्हापूरात १९ जानेवारीला सभा
राहुल शहा यांची निवड
याबाबत सविस्तर हकिगत अशी, की तीन वर्षांपूर्वी झालेल्या नगरपालिका निवडणुकीमध्ये कॉंग्रेसचे तत्कालीन आमदार भारत भालके व राष्ट्रवादी कॉंग्रेसचे राहुल शहा या दोन्ही गटांनी एकत्र येऊन स्थापन केलेल्या आघाडीच्या प्रमुखपदी राहुल शहा यांची निवड करण्यात आली. नगरपालिकेमध्ये सदस्यांना बजावण्याचे अधिकार हे त्यांना असताना त्यांनी त्यावेळी पक्षनेते म्हणून ते अधिकार अजित जगताप यांना दिले होते, परंतु ते अधिकारदेखील त्यांनी मध्यंतरीच्या काळात त्यांच्याकडून काढले आणि पांडुरंग नाईकवडी यांची पक्षनेते म्हणून निवड केली. दरम्यान, राहुल शहा यांनी पालिकेच्या राजकारणातून अंग काढून घेतले. नुकत्याच झालेल्या नगरपालिका निवडणुकीत राहुल शहा यांनी आमदार परिचारक गटाचे नेतृत्व स्वीकारले तर त्यांचे समर्थक असलेले पक्षनेते पांडुरंग नाईकवाडे यांनी आमदार भारत भालके यांचे नेतृत्व स्वीकारले. 

हेही वाचा - माळशिरच्या झेडपी सदस्यांची गुरुवारी सुनावणी
अजित जगताप पक्षनेतेपदी
तहसीलदार स्वप्नील रावडे यांच्या अध्यक्षतेखाली विषय समितीच्या निवडी पार पडल्या. त्यामध्ये पांडुरंग नाईकवडी यांच्याऐवजी पक्षनेते म्हणून अजित जगताप यांची निवड झाल्याची माहिती पालिकेत समजताच खळबळ उडाली. अजित जगताप यांनी सुचवलेल्या निवडीत विद्यमान उपनगराध्यक्ष चंद्रकांत घुले यांची पाणीपुरवठा समिती सभापतिपदी, आरोग्य सभापतिपदी प्रवीण खवतोडे, बांधकाम समिती सभापतिपदी राजश्री टाकणे, महिला बालकल्याण समिती सभापतिपदी रतन पडवळे, नियोजन समिती सभापतिपदी सुमन शिंदे आदी निवडी बिनविरोध करण्यात आल्या. या निवडीवर विद्यमान पक्षनेते पांडुरंग नायकवडी यांनी पक्षनेत्यांची निवड बेकायदेशीर असून त्यावर आक्षेप घेतला असल्याचे समजते. दरम्यान, पक्षनेते म्हणून कोणाला संधी द्यायची, याचे सर्वाधिकार राहुल शहा यांना असल्याने राहुल शहा यांची भूमिका निर्णायक ठरणार आहे.