Maratha Reservation : मराठा-कुणबी नोंदीचे पुरावे दाखल करण्याची आज शेवटची संधी; जिल्हा प्रशासनानं केलं 'हे' आवाहन

सांगली : मराठा-कुणबी, कुणबी-मराठा जातीचे (Maratha Kunbi Certificate) जात प्रमाणपत्र पात्र व्यक्तींना देण्याबाबत कार्यपद्धतीच्या अनुषंगाने जिल्ह्यातील नागरिकांकडून त्यांच्याकडील उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तावेज इत्यादी जुने अभिलेखे जिल्हाधिकारी कार्यालयातील (Collector Office) विशेष कक्षात सादर करण्याची अंतिम मुदत आज (ता. २४) आहे.

जिल्हा प्रशासनाकडून असे आवाहन करण्यात आले आहे. मराठा-कुणबी, कुणबी-मराठा जातीचे जात प्रमाणपत्र पात्र व्यक्तींना देण्याबाबतची कार्यपद्धती विहीत करण्यासाठी न्यायमूर्ती संदीप शिंदे (निवृत्त) यांच्या अध्यक्षतेखाली समिती स्थापन केली आहे. या समितीची कार्यकक्षा संपूर्ण महाराष्ट्र राज्य करण्यात आली आहे.

या समितीचा विभागनिहाय दौरा प्रसिद्ध करण्यात आला आहे. त्या अनुषंगाने जिल्ह्यातील नागरिकांकडून त्यांच्याकडील उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तावेज इत्यादी जुने अभिलेखे समितीस संबंधित जिल्हाधिकारी कार्यालयातील स्थापित विशेष कक्षात जमा करावयाचे आहेत.