‘मराठा आरक्षण ओबीसीतून नको’ : विजय वडेट्टीवार

सांगली : मराठा समाजाला आरक्षण देण्यास विरोध नाही, पण ओबीसींच्या आरक्षणात घुसखोरी होऊ देणार नसल्याचा इशारा मदत व पुनर्वसन मंत्री विजय वडेट्टीवार यांनी शनिवारी दिला. ओबीसींचे जीवनमान सुधारण्यासाठी नोकरी, राजकारणात आरक्षण हवे. ओबीसी आरक्षणासाठी स्वतंत्र जनगणनाच हवी. त्यासाठीच लढाई सुरू केली आहे. ही लढाई देशभर घेऊन जाणार आहे, असे प्रतिपादनही त्यांनी केले.

सांगलीतील स्टेशन चौकात आज ओबीसी व्हीजेएनटी बहुजन परिषदेतर्फे विभागीय आक्रोश मेळावा झाला. वडेट्टीवार म्हणाले की, प्रसंगी घटना दुरुस्ती करा, ५० टक्क्यावर घेऊन जावा. ७०-८० टक्के करा, सर्वांना आरक्षण द्या.

समाजाच्या जीवावर आमदार होत नाही

‘‘समाजाच्या जीवावर मी आमदार होत नाही. मराठा समाजाला फसवून आमदार झाले. मात्र मी पाच वेळा आमदार झालो. त्यामध्ये तीन वेळा मंत्री राहिलो आहे,’’ असा टोला आमदार विनायक मेटे यांचे नाव न घेता वडेट्टीवार यांनी लगावला.