पंढरपूरच्या विठ्ठल मंदिरात 1 जानेवारीपासून मोबाईल बंदी

अभय जोशी
सोमवार, 9 डिसेंबर 2019

अनेक भाविक दर्शन रांगेत मोबाईलवरुन फोटो काढतात. गाभाऱ्यात सेल्फीचे प्रयत्न होतात. त्यामुळे सातत्याने वाद होतात. मंदिराच्या अन्य भागात फोटो काढताना भान ठेवले जात नाही. अशा घटनांमुळे मोबाईल बंदीचा निर्णय समितीने सर्वानुमते घेण्यात आला आहे.
विठ्ठल जोशी, कार्यकारी अधिकारी, पंढरपूर

पंढरपूरच्या विठ्ठल मंदिरात 1 जानेवारीपासून मोबाईल बंदी

पंढरपूर : श्री विठ्ठल मंदिराच्या सुरक्षेच्या दृष्टीने 1 जानेवारी 2020 पासून मंदिरात मोबाईल नेण्यास बंदी करण्याचा निर्णय मंदिर समितीच्या आज झालेल्या बैठकीत घेण्यात आला. मंदिर समितीकडे जमा झालेली नाणी बॅंका स्विकारत नसल्याने समितीकडे तब्बल 55 लाख रुपयांची नाणी पडून आहेत. एचडीएफसी बॅंकेने ही नाणी घेण्याची तयारी दर्शवली असल्याने त्या बॅंकेत खाते उघडून ही नाणी मुदत ठेव स्वरुपात जमा करण्याचा निर्णयही घेण्यात आला.

हेही वाचा -

सत्यभामाची जुन्या सायकलने राष्ट्रीय स्पर्धेसाठी तयारी

समितीचे सहअध्यक्ष गहिनीनाथ महाराज औसेकर यांच्या अध्यक्षतेखाली आज बैठक झाली.अंतर्गत सुरक्षेसाठी 34 सुरक्षा कर्मचारी नियुक्त करण्याचे ठरवण्यात आले. श्री संत ज्ञानेश्‍वर महाराज संजीवन समाधी सोहळ्यासाठी श्री क्षेत्र पंढरपूर ते श्री क्षेत्र आळंदी दरम्यान श्री संत नामदेव महाराज पालखी सोहळ्यात जेसीबी मशीन घुसल्याने संत नामदेव महाराजांचे 17 वे वंशज सोपान महाराज नामदास तसेच अतुल महादेव आळशी यांचा अपघाती मृत्यू झाला. त्यांच्या कुटुंबियांकडे प्रत्येकी अडीच लाख रुपये मदत देण्यात येणार आहे.

हेही वाचा -

हरकतींवर अखेर निकाल

श्री विठ्ठल सभामंडप व श्री रुक्‍मिणी सभामंडप येथे मंदिर समितीचे कार्यक्रम वगळून सप्ताह, भजन, किर्तन आणि अन्य कार्यक्रमासाठी स्पिकर लावण्यास बंदी करण्याचे ठरलेश्री विठ्ठल रुक्‍मिणी भक्त निवासाच्या प्रसिध्दी साठी शहरात विविध ठिकाणी फलक लावण्यास व भक्त निवास मधील तबक उद्यान प्रति दिन 50 हजार रुपये प्रमाणे योग्य अटी आणि शर्तींवर भाडे तत्वावर देण्याचे ठरले. तेथील गाळे व ऑफीसेस ई लिलाव पध्दतीने मासिक भाड्यावर बोली न लावता सुरक्षा रकमेवर भाडे तत्वावर देण्याचे ठरवण्यात आले. निगडी येथील भक्ती शक्ती चौकाच्या धर्तीवर मंदिरावरील ध्वज उभारण्यास व श्री संत नामदेव महाराज यांची 750 वी जयंती मंदिर समिती मार्फत साजरी करावी तसेच संत नामदेव पायरीचे संवर्धन करण्याचा निर्णय घेण्यात आला.

हेही वाचा -

अजितदादांच्या उपमुख्यमंत्रीपदाला हरकत नाही

बैठकीस शकुंतला नडगिरे, संभाजी शिंदे, ज्ञानेश्‍वर महाराज जळगावकर, प्रकाश महाराज जवंजाळ, नगराध्यक्षा साधना भोसले, कार्यकारी अधिकारी विठ्ठल तथा सुनील जोशी, व्यवस्थापक बालाजी पुदलवाड , लेखा अधिकारी सुरेश कदम उपस्थित होते.
मोबाईल बंदीमुळे भाविकांची गैरसोय
विठ्ठल मंदिरात मोबाईल नेण्यास पूर्वी पोलिस विभागाने बंदी घातली होती. त्यामुळे भाविकांची मोठी गैरसोय होत होती. भाविकांना त्यांच्याकडील मोबाईल मंदिरात दर्शनाला जाताना दहा, वीस रुपये भाडे देऊन जवळपासच्या दुकानात ठेवावे लागत होते. भाविकांची गैरसोय लक्षात घेऊन पोलिसांनी मोबाईल बंदी उठवली होती. आता बंदीमुळे पुन्हा भाविकांची गैरसोय होणार आहे.

 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Mobile ban in pandharpur Vitthal temple