पुढील चार वर्षे शिक्षण हेच जिल्ह्याचे 'स्पेशलाईजेशन' : जयंत पाटील

सांगली : 'माझी शाळा, आदर्श शाळा' उपक्रम म्हणजे केवळ इमारत दुरुस्ती, शौचालय बांधकाम असे समजू नका. शाळांची भौतिक आणि शैक्षणिक गुणवत्ता वाढवण्यासाठी प्रत्येक घटकाचे मला यात योगदान हवे आहे. मी स्वतः शाळांना भेटी देणार आहे. पुढील चार वर्षे शिक्षण हेच जिल्ह्याचे 'स्पेशलाईजेशन' ठरवून काम करू. त्यासाठी राज्यातून जादा निधी आणू, अशी ग्वाही पालकमंत्री जयंत पाटील यांनी आज दिली. 

जिल्हा परिषदेतर्फे येथील विष्णुदास भावे नाट्यमंदिरात आयोजित 'माझी शाळा, आदर्श शाळा' उपक्रमाचे उद्‌घाटन जयंतरावांच्या हस्ते झाले. अध्यक्ष सौ. प्राजक्ता कोरे अध्यक्षस्थानी होत्या. खासदार संजय पाटील, आमदार अरुण लाड, सभापती आशा पाटील, प्रमोद शेंडगे, जिल्हाधिकारी डॉ. अभिजित चौधरी, मुख्य कार्यकारी अधिकारी जितेंद्र डुडी, अतिरिक्त मुख्य कार्यकारी अधिकारी चंद्रकांत गुडेवार, प्रभारी शिक्षणाधिकारी राहुल गावडे व्यासपीठावर होते. 

हेही वाचा - रोहितने दिली जीवे मारण्याची धमकी अन् विशालच्या पाठीत धारदार शस्त्राने केले वार -

जयंत पाटील म्हणाले, 'जितेंद्र डुडी यांचा शिक्षण व्यवस्था सुधारण्याबाबतचा स्पार्क पाहूनच मी त्यांची निवड केली होती. त्यांनी केलेली मांडणी लक्षवेधी आणि आश्‍वस्त करणारी आहे. हा उपक्रम एक चळवळ म्हणून पुढे न्यायचा आहे. लोकप्रतिनिधींचे शाळांकडे दुर्लक्ष झाले, आता ते होऊ नये. हेवेदावे बाजूला ठेवून काम करा. शिक्षणातील नव्या कल्पनांना वाव द्या. शिक्षक-पालक संवाद वाढवा. सरपंचांनी स्वतः लक्ष घालावे. शाळा समितीच्या हाती थोडा निधी देता यावा, शाळांत स्पर्धा लागावी, यासाठी पाच ते सात कोटींचा स्वतंत्र फंड उभा करू. उत्तम शाळांना बोनस देऊ. मुलांना शाळेत कंटाळा वाटू नये, आनंदच मिळावा, अशी व्यवस्था निर्माण करू. कल्चरल क्‍लब, स्पोर्टस्‌ क्‍लब, हॉबी क्‍लब, सिनेमा क्‍लब स्थापन करा. रिक्त पदांबाबत दोन दिवसांत मुंबईत शिक्षणमंत्री वर्षा गायकवाड यांच्याशी बैठक घेऊन तो विषय मार्गी लावतो.'

डुडी यांनी उपक्रमाचा आराखडा पीपीटीच्या माध्यमातून सादर केला. विद्यार्थी, पालक, सरपंच, सदस्य, शिक्षक, शाळा समिती या साऱ्यांचे योगदान मला हवे, असे आवाहन केले. अध्यक्षा प्राजक्ता कोरे, सभापती आशा पाटील, खासदार संजय पाटील, आमदार अरुण लाड, जिल्हाधिकारी डॉ. चौधरी यांचे भाषण झाले. 

आशाताई राष्ट्रवादीत कशा काय नाहीत बरे? 

शिक्षण सभापती आशा पाटील यांच्या भाषणाने जयंतराव प्रभावित झाले. ते म्हणाले, 'आशाताईंचे भाषण हृदयातून होते. त्या बोलताना मी विचार करत होतो, या आपल्या पक्षात कशा नाहीत?' सौ. पाटील अजितराव घोरपडे समर्थक आहेत. 

हेही वाचा - २५ वर्ष एकत्र राहण्याचं गूढ कायम ; दोघांची आत्महत्या -

गुडेवारांना चिमटा 

जयंतरावांनी चंद्रकांत गुडेवार यांना चिमटा काढला. जिल्हा परिषद अध्यक्षांना काही अधिकारच राहिले नाहीत, असे सांगताना जयंत पाटील म्हणाले, 'तुम्ही एखादे बांधकाम करायचे म्हटले की लगेच चौकशी ही घाबरायची वेळ येते. तुमच्या मागे बसलेले (चंद्रकांत गुडेवार) लगेच चौकशी करतात.'  

संपादन - स्नेहल कदम