निपाणी : पोलिसांची राहणार मद्यपींवर नजर!

निपाणी: यंदा होळी, धुलीवंदनानंतर मंगळवारी (ता. २२) रंगपंचमी साजरी होणार आहे. त्यामुळे निपाणी शहरासह ग्रामीण भागात कायदा व सुव्यस्था अबाधित राखण्यासाठी पोलिस दलाने कंबर कसली आहे. कोणताही अनुचित प्रकार घडू नये, म्हणून पोलिस प्रशासनाने रंगपंचमीला मद्यपी नागरिक आणि वाहनचालकांवर विशेष लक्ष केंद्रीत करण्यासाठी बंदोबस्ताचे नियोजन केले आहे. चौका-चौकात बॅरिकेट्स लावून व ब्रीथ अॅनालायझरद्वारे तपासणी करून हुल्लडबाजांवर कारवाई केली जाणार आहे.

निपाणी तालुक्यात मंगळवारी (ता. २२) रंगपंचमी सण साजरा होणार आहे. या उत्सवासाठी बंदोबस्त करण्याचे आव्हान पोलिस दलापुढे आहे. या दिवशी शहर, ग्रामीण भागात कोणत्याही प्रकारची अप्रिय घटना घडून कायदा व सुव्यवस्थेचा प्रश्न निर्माण होवू नये, म्हणून पोलिसांच्या बंदोबस्तात वाढ केली जाणार आहे. मंडल पोलिस निरीक्षक कार्यालयाच्या कार्यक्षेत्रातील सर्व पोलिस ठाण्याच्या हद्दीत मुख्य चौकात पोलिसांचा कडक बंदोबस्त नेमला जाणार आहे. शहर वाहतूक नियंत्रण पोलिसांतर्फे विशेष मोहीम व नाकाबंदी होणार असून रंगपंचमी साजरी करताना नागरिकांना खबरदारी घ्यावी लागणार आहे.

तर होईल वाहन चालकांवर कारवाई

पोलिसांनी चौका-चौकात हुल्लडबाजांवर कारवाई करण्यासाठी बंदोबस्ताचे नियोजन केले आहे. ज्यामध्ये मद्य प्राशन करून वाहन चालविणाऱय़ा व्यक्ती, ट्रिपल सिट बसवून वाहन चालविणारे, मोबाईल फोनवर बोलत वाहन चालविणारे, अती वेगाने संशयितरित्या वाहन चालविणे, महिला, युवतींची छेडछाड करून पळणा-यांवर कठोर कारवाई केली जाणार आहे. मद्यपी आढळल्यास, मद्य प्राशन करून वाहन चालविणाऱ्या चालकांची ब्रीथ अॅनालायझरव्दारे तपासणी केली जाणार आहे. त्यांना सरकारी रुग्णालयात नेवून तपासणी करून कायदेशीर गुन्हा दाखल केला जाईल. महिलेची छेडछाड करून महिला सुरक्षेचा प्रश्न निर्माण करणाऱ्या हुल्लडबाजांवर कठोर कारवाई केली जाईल, असा इशारा पोलिसांनी दिला आहे

संगमेश शिवयोगी

'रंगपंचमी सण केवळ तीन दिवसांवर आला असून या काळातील गैरप्रकार टाळण्यासाठी पोलिसांनी बंदोबस्ताचे नियोजन केले आहे. या काळात मद्यप्राशन करून वाहन चालविणे व रंगपंचमी साजरी करण्यास मनाई आहे. त्याचे उल्लंघन करणाऱ्यांवर कायदेशीर कारवाई केली जाईल.'

-संगमेश शिवयोगी,मंडळ पोलिस निरीक्षक, निपाणी