ओएलएक्‍सवर बाईकची जाहिरात! वाचा कसा फसला तरुण..

सोलापूर : ओएलएक्‍स ऍपवर सेंकड हॅण्ड गाडी विकण्याचे अमिष दाखवून सोलापुरातील तरुणाची ऑनलाइन माध्यमातून 43 हजार 48 रुपयाची फसवणूक करण्यात आली आहे. याप्रकरणी जितेंद्रसिंह नावाच्या व्यक्तीवर सदर बझार पोलिस ठाण्यात गुन्हा दाखल करण्यात आला आहे. आठवड्यात अशा प्रकारे ऑनलाइन फसवणूक केल्याची ही दुसरी घटना उघडकीस आली आहे. 

विविध कारणे सांगून घेतले पैसे
क्षितिज राजू बेरे (वय 24, रा. नवोदितनगर, सोलापूर) असे फसवणूक झालेल्या तरुणाचे नाव आहे. क्षितिज बेरे यांनी ओएलएक्‍सवर दुचाकी विकण्याची जाहिरात पाहिली होती. या जाहिरातीच्या लिंकवर क्‍लीक केल्यानंतर त्यांना अधिक माहिती मिळाली. दुचाकीचा व्यवहार हा 35 हजार रुपयांत ठरवण्यात आला. त्यानंतर जितेंद्रसिंह याने गाडी नावावर करण्यासाठी, इन्शुरन्स अशी विविध कारणे सांगून वेळोवळी क्षितिज यांच्याकडून पैसे ऑनलाइन पद्धतीने घेतले.

हेही वाचा : फेसबुकवरून बुलेट खरेदी पडली महागात

जकात नाक्‍यावर गाडी अडवण्यात आली
लातूर बोरफळ येथे जकात नाक्‍यावर गाडी अडवण्यात आली असून आणखी पाच हजार रुपये मागितले. त्यानंतर फसवणूक होत असल्याचे लक्षात आल्यानंतर क्षितिज बेरे यांनी पोलिसात फिर्याद दिली. सेंकड हॅण्ड गाडी विकण्याचे अमिष दाखवून जितेंद्रसिंह याने ऑनलाइन पद्धतीने 43 हजार 48 रुपये घेऊन फसवणूक केल्याप्रकरणी गुन्हा दाखल करण्यात आला आहे. अधिक तपास दुय्यम पोलिस निरीक्षक संजय पाटील करत आहेत.