Sangli Police : सांगलीत कॉलर धरून, जातिवाचक शिव्या देत पोलिसाला मारहाण; विश्रामबाग पोलिस ठाण्यात ॲट्रॉसिटी गुन्हा दाखल

सांगली : विश्रामबाग येथील जयहिंद कॉलनीमध्ये पोलिस कर्मचाऱ्यास किरकोळ कारणातून मारहाण करत जातिवाचक शिवीगाळ झाली. नितीन पारेख (विजय अपार्टमेंट, जयहिंद कॉलनी) याच्याविरोधात विश्रामबाग पोलिस ठाण्यात ॲट्रॉसिटीसह मारहाणीचा गुन्हा नोंद झाला.

पोलिस कर्मचारी विशाल विजय शिंदे (वय ३७, शंभर फुटी रस्ता, शामरावनगर) यांनी फिर्याद दिली. पोलिसांनी माहिती दिली, की विशाल शिंदे सांगली पोलिस दलात आहेत. सध्या ते पालकमंत्री सुरेश खाडे यांच्याकडे अंगरक्षक म्हणून कार्यरत आहेत.

काल सायंकाळी सहाच्या सुमारास ते जयहिंद कॉलनीतील विजय अपार्टमेंटच्या गाळा क्रमांक सहात आले होते. संशयित पारेख व्हीएस मल्टिसर्व्हिसेस येथे आला. त्याने किरकोळ कारणातून गौरव देशमुख यास मारहाण सुरू केली. हे पाहून शिंदे तेथे गेले. वाद सोडवण्यास मध्यस्थी केली.

पारेखने विशाल शिंदेंची कॉलर धरून मारहाण केली. सार्वजनिक ठिकाणी जातिवाचक शिवीगाळ करत दमदाटीही केली. त्यानंतर काल रात्री उशिरा शिंदे यांनी विश्रामबाग पोलिस ठाण्यात फिर्याद दिली. नितीन पारेखवर मारहाणीसह ॲट्रॉसिटीनुसार गुन्हा नोंद करण्यात आला. पोलिस उपाधीक्षक प्रणील गिल्डा तपास करत आहेत.