कोरोनाबाबत "प्रवरा"चे हे आहे नवे संशोधन, मान्यता मिळाल्यास...

लोणी : कोरोना संशयिताचे स्वॅब तपासणीसाठी वेगवेगळ्या प्रकारचे तंत्रज्ञान समोर येत आहे. चाचणीसाठीही बराच कालावधी लागत आहे. रिपोर्ट जरी निगेटिव्ह आला तरी तो कळेपर्यंत संबंधिताला मोठ्या मानसिक तणावातून जावे लागते. वेळ आणि पैसा वाचला तर संशयित वाटणाऱ्यांच्या चाचण्या करून वेळीच कोरोनाला प्रतिबंध करता येईल. त्याबाबत प्रवरा इन्सिट्यूट अॉफ मेडिकल सायन्सेसने वेगळं संशोधन केलं आहे.

केवळ एक्‍स-रे आणि रक्त चाचणीच्या साह्याने "आर्टिफिशियल इंटेलिजन्स' तंत्रज्ञानातून काही सेकंदांत रुग्णांची वर्गवारी कोरोनाबाधित, कोरोना संशयित किंवा निगेटिव्ह कळणार आहे.

हेही वाचा - तिकडे देव कोंडला, इकडे फुलांची झाली हत्या

प्रवरा इन्स्टिट्यूट ऑफ मेडिकल सायन्सेस आणि ग्रेट ब्रिटनस्थित एआय फॉर वर्ल्ड संस्थेशी परस्पर सहकार्य करार करून ही प्रणाली वापरणार असल्याची माहिती प्रवरा अभिमत विद्यापीठाचे उपकुलपती डॉ. राजेंद्र विखे पाटील यांनी दिली. विद्यापीठाचे कुलगुरू डॉ. वाय. एम. जयराज, डॉ. सुरेश जंगले, डॉ. रवींद्र कारले उपस्थित होते.

डॉ. विखे पाटील म्हणाले, की कोरोना व इतर आजारातील फरक ओळखण्यासाठी प्रवरा अभिमत विद्यापीठाने "एआय फॉर वर्ल्ड' संस्थेचे कार्यकारी संचालक व प्रवराचे माजी विद्यार्थी डॉ. वैभव देशपांडे यांच्याबरोबर सामंजस्य करार केला आहे. त्यातून देशात प्रथमच आर्टिफिशियल इंटेलिजन्सच्या साह्याने प्राथमिक चाचणीचे तंत्रज्ञान पुढे आणले आहे.

कोरोनाच्या चाचणीत रुग्णांचा एक्‍स-रे आणि रक्त तपासणीचा अहवाल "अपलोड' केल्यानंतर फक्त पाच सेकंदांत संगणकाच्या साह्याने रुग्ण कोरोनाबाधित आहे की नाही, हे तपासता येते. या प्रणालीचे निदान 99.9 टक्के इतके अचूक आहे. या चाचणीच्या शासकीय मान्यतेसाठी प्रयत्न असल्याचे संशोधन विभागाचे प्रमुख डॉ. राहुल कुंकूलोळ यांनी सांगितले.