रुपयाही भाव नसल्याने बोराच्या बागेवर फिरवला ट्रॅक्‍टर 

सोलापूर ः डाळिंब-बोर पंढरी म्हणून प्रसिद्ध असलेल्या सांगोला तालुक्‍यातील उत्पादक यंदा अवकाळी पावसाने आणि कोसळलेल्या भावामुळे आर्थिक अडचणीत सापडले आहेत. बोराला किलोसाठी एक रुपयाही भाव नसल्याने तालुक्‍यातील वाकी गावातील शेतकऱ्यांनी तीन एकरावरील बोर बागेवर ट्रॅक्‍टर फिरवला. 

हेही वाचा - सोलापुरात आता मुंबईतील कच्छी दाबेली 

बोरे घ्यायला कोणी नाही तयार 
वाकी येथील अनिल, सुनील, कुमार जाधव ही भावंडांच्या कुटुंबाचा उदरनिर्वाह शेतीवर अवलंबून आहे. साडेआठ एकरातील डाळिंब बागेत पावसामुळे सेटिंग झाले नाही. पण गेल्यावर्षी इतर शेतकऱ्यांनी बोर बागा तोडल्याने आमच्या बोराना चार पैसे मिळतील असे वाटत होते. पण रूपाया किलोने बोरे कोणी घ्यायला तयार नाही. व्यापाऱ्याला बोलावून बोरे विकत घ्यायला सांगितले. त्यावर बोरे तोडून 5 रुपये किलो भावाने विकत घेतो असे व्यापारी म्हणाला. प्रत्यक्षात 1 टन बोरे तोडण्यासाठी 10 जणांना द्यावा लागणारा रोजगार पाहता, खर्च परवडणारा नव्हता. त्यामुळे बाग तोडण्याचा निर्णय घेतला. त्यासाठी तासाला 500 रुपये याप्रमाणे 10 तासाचा खर्च द्यावा लागला. 

हेही वाचा - सिद्धेश्वर यात्रेनिमित्त जनावारांचा बाजार शनिवारपासून 
 

सफरचंद एवढी बोरे 
जाधव यांच्या बागेतील बोरे सफरचंदाच्या आकाराची झाली होती. तोड नसल्याने बोरे गळून पडून वास यायला लागला होता. मुळातच, 3 वर्षापूर्वीच्या बागेवर जाधवांनी लागवड, शेणखत, वरखत, फवारणी, मजुरी असा आतापर्यंत साडेसहा लाखपर्यंतचा खर्च केलाय. गेल्यावर्षी पहिले 50 टनाचे उत्पादन मिळाले होते. ही बोरे व्यापाऱ्यांना विकण्याबरोबर नागपूर बाजारपेठेत विकली होती. त्यातील 1 लाखाचा खर्च वजा जाता, 2 लाख मिळाले होते. उर्वरित खर्च यंदा निघेल अशी त्यांची अपेक्षा होती. पण त्यावर पाणी फिरले.