इथे बसून चंद्रावरील यान नियंत्रित करू शकतो तर 'ईव्हीएम'चे काय ? रघुनाथदादा पाटील

सांगोला : इथे बसून चंद्रावरील यान नियंत्रित करू शकतो तर ईव्हीएम कुठेही बसून नियंत्रित करतील. यासाठीच ईव्हीएम हटावची भूमिका आम्ही घेतली असल्याची माहिती शेतकरी संघटनेचे रघुनाथदादा पाटील यांनी सांगोला येथील पत्रकार परिषदेत दिली.

सांगोला येथे रघुनाथदादा पाटील यांच्या मार्गदर्शनाखाली विविध मागण्यांसाठी सांगोला येथे बुधवार (ता. 17) रोजी धरणे आंदोलन करण्यात आले होते. यावेळी पत्रकारांची संवाद साधताना रघुनाथदादा पाटील बोलत होते.

सर्व शेतकरी संघटना एकत्रित का होत नाहीत या प्रश्नावर बोलताना रघुनाथदादा पाटील म्हणाले की, आम्ही शेतकऱ्यांच्या प्रश्नासाठी कधीही एकत्रित यायला तयार आहे. परंतु जे कोणी शेतकऱ्यांची वाली म्हणून घेत आहेत ते शेतकऱ्यांच्या प्रश्नावर किती लढतात हे महत्त्वाचे आहे.

राजू शेट्टी हे कारखानदार व राजकारण्यांशी संगणमत करून आमदार, खासदार झाले आहेत. मी कधीही आमदार, खासदार झालो असतो परंतु मला शेतकऱ्यांचे प्रश्न महत्त्वाचे आहेत व त्यासाठीच आम्ही लढा देत आहोत.

मतदान घेण्यासाठी ईव्हीएम मशीन बाजूला सारून जुन्या बॅलेट पेपरवर मतदान घेतले गेले पाहिजे. यासाठी आम्ही आग्रही असून हा लढा गाव तळापासून सर्वांनी मिळून लढण्याचे आम्ही ठरवले आहे. यावेळी शेतकरी संघटनेचे बाळासाहेब वाळके, बापू ठोकळे, अशोक शिनगारे उपस्थित होते.

शेतकरी संघटनेच्या वतीने दिले निवेदन

शेतकरी संघटनेच्या वतीने धरणे आंदोलन केल्यानंतर विविध मागण्यांचे निवेदन तहसीलदार यांना देण्यात आले निवेदन नायब तहसीलदार यांनी स्वीकारले. शेतकरी संघटनेच्या वतीने दिलेल्या निवेदनामध्ये सर्व शेतीमालावरील निर्यात बंदी ताबडतोब हटवावी, स्वामीनाथन आयोगाच्या शिफारशींची अंमलबजावणी केली पाहिजे, ईव्हीएम मशीन हटाव, देश बचाव, दोन साखर कारखान्यांमधील हवाई अंतराची अट तात्काळ रद्द करावी, सरसकट सर्व शेतकऱ्यांची,

कामगारांची, कर्जदारांची कर्जमुक्ती व वीज बिल मुक्ती तात्काळ करावी, केंद्र व महाराष्ट्र सरकारने सर्व खात्यावरील सर्व रिक्त जागांची तात्काळ भरती करावी, सांगोला तालुक्यातील जे पक्के रस्ते झाले आहेत व होणार आहेत त्या शेतकऱ्यांच्या शेतातून जाणारे रस्त्यांचे भूसंपादन करून शेतकऱ्यांना मोबाईलला दिला जावा,

सरसकट दूध उत्पादकांना विनाअट पाच रुपये दूध अनुदान दिले जावे, शेतकरी सहकारी सूतगिरणी येथील भंगाराच्या नावाने चांगल्या मशनरी विक्री केल्याबद्दल तक्रारीची तात्काळ चौकशी करावी अशा विविध मागण्यांचे निवेदन देण्यात आले.