Ratnagiri : राजापूर बाजारपेठेतील अतिक्रमणे भुईसपाट

राजापूर : अनंत चतुर्दशीच्या गणेश विसर्जन मिरवणुकीत अडथळा ठरणारी राजापूर बाजारपेठेतील अतिकमणे आणि झड्या हटविण्याचे पालिकेने आदेश देऊनही काही व्यापाऱ्यांनी त्याकडे दुर्लक्ष केले. त्यामुळे अखेर नगर परिषदेचे मुख्याधिकारी प्रशांत भोसले यांनी पोलिस बंदोबस्तात अतिकमणांवर कारवाई केली. या कारवाईमुळे बाजारपेठेतील रस्त्याने मोकळा श्वास घेतला असून, या कारवाईचे नागरिकांतून स्वागत केले जात आहे.

शहरातील बाजारपेठेतून जाणारा रस्ता मुळातच अरूंद आहे. त्यातच गणेशोत्सवात या रस्त्यावर अनेक दुकानदारांनी दुकाने थाटली होती. काही व्यापाऱ्यानी तर अध्या रस्त्यापर्यंत साहित्य थाटले होते. शिवाय दुकानासमोर रस्त्यावर झड्या उभारल्या होता. अनंत चतुर्दशीला या मार्गावरून गणेश विसर्जन मिरवणुका जात असल्याने सदरची अतिकमणे हटविण्याच्या सूचना नगर पालिकेने व्यापाऱ्यांना दिल्या होत्या. त्याबाबतच्या नोटिसाही प्रशासनाने बजाविल्या होत्या. मात्र, काही व्यापाऱ्यानी या नोटीसांना न जुमानता नगर पालिकेले आव्हान देण्याचा प्रयत्न केला. तर काहींनी मुख्याधिकारी भोसले यांच्याशी हुज्जत घालण्याचा प्रयत्न केला. त्यामुळे अखेर मुख्याधिकारी भोसले यांनी या अतिक्रमणांवर काल धडक कारवाई करत अतिकमणे हटविली आहेत.

या कारवाईनंतर पुढील तीन दिवस नगर परिषदेचे अधिकारी, कर्मचारी देखरेख ठेवणार असून यापुढे अतीक्रमणे करण्याचा पुन्हा प्रयत्न झाल्यास थेट न्यायालयीन कारवाईची प्रकिया हाती घेण्यात येणार असल्याचे प्रशासनाकडून सांगण्यात आले.

आता शिवाजी महाराज रस्त्यावर कारवाई

बाजारपेठेनंतर आता अतिक्रमणे हटविण्याची कारवाई छत्रपती शिवाजी महाराज रस्त्यावर केली जाणार आहे. या रस्त्याचे नुकतेच एक कोटी २२ लाख रुपये खर्च करून काँकीटीकरण करण्यात आले आहे. मुख्याधिकारी भोसले व सहकाऱ्यांनी केलेल्या या मोहिमेचे शहरातील नागरिकांनीच नव्हे, तर व्यापाऱ्यांनीही स्वागत केले आहे. शहराचा बकालपणा नष्ट करण्यासाठी नगरपालिका घेत असलेल्या भूमिकेचे व धाडसाचे कौतुक होत आहे.