ऑक्टोबर महिन्यातच कच्चा आंबा दाखल

बेळगाव : फळांचा राजा म्हणून ओळख असणाऱ्या आणि सर्वांच्या पसंतीच्या आंब्याची चव चाखण्यासाठी नागरिकांना फेब्रुवारी किंवा मार्च महिन्यापर्यंत वाट पाहावी लागत असते; मात्र बेळगाव शहरात ऑक्टोबर महिन्यातच आंबा विक्रीसाठी उपलब्ध झाला असून शहराच्या विविध भागात आंबे विक्री करणारे विक्रेते दृष्टीस पडू लागले आहेत.

चार-पाच दिवसांपासून शहरातील काही मोजक्या फळ विक्रेत्यांकडे मोठ्या आकारातील कच्चे आंबे विक्रीसाठी उपलब्ध झाले होते. त्यामुळे नागरिक स्वतःहून जाऊन आंबा कोणत्या प्रकारचा आहे आणि दर काय आहे, याची माहिती करून घेताना दिसून येत होते. आंबा कच्चा असला तरी चवीला चांगला असल्याने अनेकजण आंबे खरेदी करताना दिसून येत आहे. दोनशे रुपये किलो याप्रमाणे आंब्याची विक्री केली जात आहे.

आंबा उपलब्ध झाल्यानंतर खरेदी करण्यासाठी ग्राहक मोठ्या संख्येने येत आहेत. विक्रेतेही मोठ्या संख्येने आंबे विक्रीसाठी उपलब्ध करून देत आहेत. त्यामुळेच सुरूवातीला काही मोजक्याच विक्रेत्यांकडे उपलब्ध असणारे आंबे अनेक लहान-मोठ्या विक्रेत्यांकडे दिसून येत आहेत.

सध्या आंब्याचा दर दोनशे रुपये किलो असला तरी ऑक्टोबर महिन्यात आंबा उपलब्ध झाल्याने अनेकजण आंबे खरेदी करू लागले आहेत. आंबा विक्री करणाऱ्या विक्रेत्यांशी संपर्क साधला असता बंगळूर आणि परिसरातून आंबे उपलब्ध होत असल्याची माहिती मिळाली. शहरात कोकणातील सर्वाधिक प्रमाणात आंबे उपलब्ध होतात. मात्र कोकणातून उपलब्ध होणारे आंबे मार्चनंतर बेळगावात येतात, तर तर स्थानिक आंबे एप्रिल व मे महिन्यात उपलब्ध होतात. त्यामुळे नागरिकांना आंब्याची चव घेण्यासाठी आंब्याचा सिझन संपल्यानंतर प्रतीक्षा करावी लागते. मात्र यावेळी ऑक्टोबर महिन्यात आंबे उपलब्ध झाले आहेत.

आंबा बाजारात उपलब्ध झाला आहे. आंबे खरेदीसाठी सध्या जास्त पैसे मोजावे लागत आहेत. त्यामुळे दर कमी होणे गरजेचे आहे. दर कमी झाल्यास सर्वसामान्य माणसालाही आंबे खरेदी करता येतील.

- वैशाली पाटील, शहापूर