esakal | भात खरेदीत व्यापारी करताहेत मनमानी ; शेतकऱ्याला बसतोय फटका
sakal

बोलून बातमी शोधा

the rice crop buying for this year comparatively less by rupees 1000 the farmers face the problem of crop rice in balgam

गतवर्षीच्या तुलनेने ही ५०० ते १,००० रुपयांपर्यंतची तफावत आहे. त्यामुळे शेतकरी आर्थिक अडचणीत सापडला आहे.

भात खरेदीत व्यापारी करताहेत मनमानी ; शेतकऱ्याला बसतोय फटका

sakal_logo
By
सकाळ वृत्तसेवा

कंग्राळी खुर्द (बेळगाव) : भारत कृषिप्रधान देश असतानाही शेतकऱ्यांच्या उत्पादनावर कोणतेही शासकीय किंवा संघटनेचे नियंत्रण नाही. त्यामुळे यंदाही भातदरात शेतकऱ्यांना व्यापाऱ्यांच्या मनमानीमुळे फटका बसत आहे. सध्या इंद्रायणीला  १,७०० ते १,८०० रुपये तर बासमतीला  २,४०० रुपये प्रतिक्विंंटल दर आहे. गतवर्षीच्या तुलनेने ही ५०० ते १,००० रुपयांपर्यंतची तफावत आहे. त्यामुळे शेतकरी आर्थिक अडचणीत सापडला आहे.

बेळगाव, खानापूर तालुके भातासाठी प्रसिद्ध असून खरीप हंगामात एकूण लागवड क्षेत्राच्या निम्म्या क्षेत्रात विविध जातींची भात पिके घेतली जातात. आर्थिक अडचणीमुळे सुगी झाल्याबरोबर शेतकरी भातविक्री करतात. विशेषकरून व्यापारी इंद्रायणी, बासमती, थोड्या प्रमाणात दोडगा भात खरेदी करतात. त्यामुळे भाताला मागील वर्षाच्या तुलनेने  १०० ते २०० रुपये वाढीव दर मिळावा, अशी अपेक्षा असते. परंतु, दराबाबत व्यापारीच सर्वेसर्वा असल्याने शेतकऱ्यांचे कोणीही ऐकत नाही. आर्थिक गरज असल्यामुळे व्यापारी मनमानी दर आकारुन शेतकऱ्यांना पट्टी देतात. यंदा रोगाने तसेच निसर्गाच्या लहरीपणामुळे सरासरी उतारा निम्म्यावरच आहे.

हेही वाचा - बेळगावात टीईटीत 2 लाख परीक्षार्थींपैकी फक्त 8 हजार पास

दरही २० टक्‍क्‍यांनी कमी असल्यामुळे भात उत्पादक शेतकरी आर्थिक अडचणीत सापडला आहे. अनुदानासह भाताची आधारभूत किंमत १,९०० रुपयांपेक्षा अधिक आहे. परंतु, एपीएमसी तसेच कृषी विभाग भात खरेदी केंद्र सुरू करण्यास उदासीनता दाखवत असल्यामुळे शेतकऱ्यांना नुकसान सोसावे लागत आहे. त्यामुळे संबंधित विभागासह शेतकरी संघटनेने भात दराबाबत जातीने लक्ष घालून पिळवणूक थांबवावी, अशी मागणी शेतकऱ्यांनी केली.

एकरी भात पिकाचा सरासरी खर्च व उत्पन्न
 

पेरणीपूर्व मशागत खर्च                 ३,००० रुपये
शेणखत २ ट्रॉल्या                        ५,००० रुपये
बियाणे खर्च.....२० किलो              २,५०० रुपये
लागवड मजुरी                            ४,००० रुपये
भांगलण खर्च                              ४,००० रुपये
रासायनिक खते खर्च                    ६,००० रुपये
औषधांचा खर्च                             ३,००० रुपये
कापणी व मळणी खर्च                  ५,००० रुपये
एकूण खर्च (सरासरी)                  ३२,५०० रुपये
यंदाचे सरासरी उत्पन                       १८ क्विंटल 

दर                             १,८०० रुपये प्रतिक्‍विंटल
एकूण उत्पन्न                              ३२,४०० रुपये

संपादन - स्नेहल कदम 

loading image