सलगरे चेकपोस्टवर ताण वाढला 

सलगरे (सांगली)  ः सलगरे, चाबुकस्वारवाडी, बेळंकीत मुंबई, पुणे व इतर राज्यातून येणाऱ्यांची संख्या वाढल्याने चेकपोस्टवर काम करणारे, आरोग्य विभाग, पोलीस, ग्रामपंचायतीच्या कर्मचाऱ्यांवरील ताण वाढला आहे. 

मिरज पूर्व भागातील सलगरे, बेळंकी, चाबुकस्वारवाडीतील अनेक नागरिक नोकरी, व्यवसाय शिक्षणासाठी विद्यार्थी निमित्त कुटुंबासह मुंबई, पुणे, अहमदाबाद, गुजरात, कलकत्ता, कर्नाटकातून मोठ्या प्रमाणात रात्रंदिवस स्वतंत्र भाड्याने गाड्या करुन मूळगावी परतत आहेत. ऑनलाईन परवान्यांची सोय झाल्यानंतर मोठ्या संख्येने नागरिक लाभ घेऊन परतत असल्याने पोलीस कर्मचाऱ्यांसह आरोग्य विभाग, आशा सेविका, चेकपोस्टवर रात्रं-दिवस काम करणारे कर्मचारी आणि ग्रामपंचायत प्रशासनावर कामाचा ताण वाढला आहे. 

बाहेरून येणाऱ्या प्रत्येक नागरिकांची नोंद घेऊन वैद्यकीय तपासणी करुन योग्य त्या सूचना देऊन त्यांना सुरक्षित ठिकाणी होमक्वारंटाईन करणे, 14 दिवस देखरेखीखाली ठेवणे अशा कामांमुळे प्रत्येक कर्मचाऱ्यांवर "कोरोना ताण' वाढत आहे. 
रोज बाहेरून येणाऱ्यांत वाढ होत आहे. सलगरे बाजारपेठेचे गाव आहे. नागरिकांची सकाळच्या वेळेत गावात गर्दी होत असल्याने पोलीस, आरोग्य, प्राथमिक शिक्षक, ग्रामपंचायतीच्या प्रशासनावर भार पडत आहे. चेकपोस्टवर कर्नाटक, बाहेरून येणा-जा करणाऱ्यांसह, वाहनांची कसून चौकशी करण्यात येत आहे. मास्क न घालणे, विना परवाना गाडी चालवणे अशा काहींना पोलीसांनी प्रसाद देऊन उठबशा काढायला लावल्या. 

आतापर्यंत आलेल्यांची संख्या 
सलगरे ः होमक्वारंटाईन-36, परजिल्ह्यातून-160 आणि परराज्यातून-19, जिल्हातंर्गत-19. एकूण-234. 
चाबुकस्वारवाडी ः होमक्वारंटाईन-13, परजिल्ह्यातून-138, परराज्यातून-09, जिल्हातंर्गत-10, एकूण-170, 
बेळंकी ः होमक्वारंटाईन-23, परजिल्ह्यातून-129, परराज्यातून-08 जिल्हातंर्गत-9. एकूण - 179.