1 नोव्हेंबर रोजी बेळगाव जिल्ह्यातील मराठी भाषिक काळा दिन पाळतात. मराठी भाषिकांना पाठिंबा देण्यासाठी महाराष्ट्रातून शिवसैनिक बेळगावला मशाल घेऊन निघाले होते.
कोगनोळी महामार्गावर शिवसेनेचा मोर्चा; मशाल रोखल्याने रास्ता रोको
कोगनोळी - 1 नोव्हेंबर रोजी बेळगाव जिल्ह्यातील मराठी भाषिक काळा दिन पाळतात. मराठी भाषिकांना पाठिंबा देण्यासाठी महाराष्ट्रातून शिवसैनिक बेळगावला मशाल घेऊन निघाले होते. त्यांना पोलिसांनी रोखल्याने येथील पुणे-बेंगलोर राष्ट्रीय महामार्गावर कोगनोळी दूधगंगा पुलावर कोल्हापूर जिल्हा शिवसेनेच्या वतीने मोर्चा काढण्यात आला. यावेळी काही काळ रास्तारोको करत महामार्गावरील वाहतूक रोखून धरली. तसेच घोषणाबाजीने परिसर दणाणून सोडला.
या प्रसंगी छत्रपती शिवाजी महाराज की जय, जय भवानी, जय शिवाजी, आवाज कुणाचा शिवसेनेचा, बेळगाव, निपाणी, बिदर, भालकीसह संयुक्त महाराष्ट्र झालाच पाहिजे, बेळगाव आमच्या हक्काचं नाही कुणाच्या बापाचं, उद्धवसाहेब, आदित्यसाहेब तुम आगे बढो हम तुम्हारे साथ है अशा घोषणा देऊन सारा परिसर दणाणून सोडला.
यावेळी बोलताना शिवसेना कोल्हापूर जिल्हाप्रमुख विजय देवणे म्हणाले, बेळगाव आमचं आहे, गाव आमचं आहे. कारवार आमचं आहे, कर्नाटकामध्ये मराठीपण माणूस आहे. आम्ही नाही ऐकणार यांचं. ही मशाल बेळगाव जिल्ह्यामध्ये नक्कीच पोहोचणार असे त्यांनी सांगितले.
याप्रसंगी कोल्हापूर जिल्हाप्रमुख संजय पवार म्हणाले, देशातील व विशेषतः या राज्यातील लोकशाही संपलेली आहे. येथे भाजपचे सरकार आहे. केंद्रामध्येही भाजपचे सरकार आहे. आज सगळीकडे अस्वस्थता आहे. भाजपची दादागिरी आहे. म्हणूनच या ठिकाणी ठिय्या मांडलेला आहे. मराठी बांधवांना न्याय मिळाला पाहिजे. ताकद मिळाली पाहिजे आणि ती आम्ही देणारच.
कोल्हापूर शिवसेनेचे शहरप्रमुख रविकिरण इंगवले, बेळगाव तालुकाप्रमुख सचिन गोर्ले, शहरप्रमुख दिलीप बेल्लूरकर, उपशहरप्रमुख राजकुमार बोकडे, संपर्कप्रमुख अरविंद नागनूरे, उपतालुकाप्रमुख पिराजी शिंदे, विभागप्रमुख रमेश माळवी, विजय सावंत यांच्यासह शिवसैनिक व पदाधिकारी मोठ्या संख्येने उपस्थित होते.
यावेळी कर्नाटक पोलिस खात्यातर्फे अप्पर पोलिस अधीक्षक महानिंग नंदगावी, पोलिस उपाधीक्षक बसवराज यलिगार, मनोजकुमार नाईक, वीरेश गोडमणी, निपाणीचे मंडल पोलीस निरीक्षक संगमेश शिवयोगी, बी. एस. तळवार, निपाणी ग्रामीण पोलिस ठाण्याचे उपनिरीक्षक अनिल कुंभार तर महाराष्ट्र पोलिस खात्याच्या वतीने कागलचे पोलिस निरीक्षक अजितकुमार जाधव, सहाय्यक पोलिस निरीक्षक दिपक वाकचौरे, पोलिस उपनिरीक्षक रविकांत गच्चे, उपनिरीक्षका मोनिका खडके यांच्यासह कर्नाटक व महाराष्ट्रातील शेकडो पोलिस कर्मचारी सहभागी झाले होते.
