शाब्बास! मनाने खंबीर असलेल्या ट्रक चालकाच्या मुलीने केले कळसुबाई शिखर सर

शिराळा : येथील स्वाती भस्मे या दिव्यांग तरूणीने महाराष्ट्रातील सर्वात उंच शिखर कळसुबाई सर करून आम्ही शरीराने कमजोर असलो तरी मनाने खंबीर व सुदृढ असल्याचे सिद्ध करून दाखवले आहे. हे शिखर सर करणारी स्वाती शिराळा तालुक्‍यातील पहिली महिला आहे. ट्रक चालकाच्या मुलीच्या या यशाचे सर्वत्र कौतुक होत आहे. 

औरंगाबाद येथील शिवऊर्जा प्रतिष्ठानने दिव्यांगांसाठी कळसुबाई शिखर सर करणारी मोहीम राबवली होती. राज्यातील 70 तर सांगली जिल्ह्यातील 11 दिव्यांग व्यक्तींनी हे शिखर सर केले. शिराळा तालुक्‍यातील स्वाती ही एकमेव आहे. तीला सुदेश माने आणि भगवान भंडारे यांचे मार्गदर्शन लाभले आहे. स्वाती लहानपणापासूनच अस्थिव्यंग आहे. तरीसुद्धा तीने तिने 18 व्या राष्ट्रीय पॅरा अथलेटिक स्पर्धेत गोळा फेक आणि थाळीफेक या क्रीडा प्रकारात दोन कास्य पदके पटकावली आहेत.

हेही वाचा - मी, माझी पत्नी आणि वडील या अपघातामुळे धास्तावलो आहोत

शिवाय देशातील पहिल्या अपंग महिला क्रिकेट संघात तिचा समावेश होता. विश्वासराव नाईक महाविद्यालयातून तीने पदवीपर्यंत चे शिक्षण पूर्ण केले आहे. दिव्यांग असलेली स्वाती 28 वर्षांची असून, तिचे वडील बाळासाहेब भस्मे हे ट्रक चालक आहेत. आई गृहिणी आहे. दोन विवाहित बहिणी असून एक लहान भाऊ आहे. तिच्या या कार्याबद्दल कुटुंबाचा सतत पाठिंबा असतो. 

"एकाग्रता, आत्मविश्वास ,सकारात्मक विचार आणि सतत नवे शिकण्याची इच्छा ही स्वातीची बलस्थाने आहेत. ती म्हणते, "आपल्या क्षमतेपेक्षा मोठ्या यशाची स्वप्ने बघितल्याने आज मला कळसुबाई शिखर सर करता आले."

- स्वाती भस्मे 

हेही वाचा -  दोन वर्षात हा प्रयोग बनला चळवळ 

संपादन - स्नेहल कदम