एका महिन्यात सोलापूर-गोवा विमानाने १४१४ जणांचा प्रवास! विमान कंपनीकडून प्रवाशांसाठी मॉन्सून ऑफर; तिकीट दर झाले ‘एवढे’ कमी

सोलापूर : फ्लाय ९१ कंपनीने प्रवाशांसाठी मॉन्सून ऑफर सुरू केली आहे. यामुळे ३१ जुलैपर्यंत बुकिंग केल्यास ३१ ऑगस्टपर्यंतच्या प्रवासावर २०० ते ५०० पर्यंतची सूट देण्यात आली आहे. दरम्यान सोलापूरच्या प्रवाशांना मुंबई व तिरुपतीचे वेध लागले आहेत. लवकरच मुंबई विमानसेवा सुरू होऊ शकते. फ्लाय ९१ कंपनीकडून ९ जुलैपासून गोवा-सोलापूर मार्गावर विमानसेवा सुरू करण्यात आली आहे. आतापर्यंत या मार्गावर १ हजार ४१४ प्रवाशांनी हवाई प्रवास केला आहे. सध्या पावसाळ्यामुळे सर्वच मार्गांसाठी फ्लाय ९१ कडून मॉन्सून ऑफर सुरू केली आहे. ही ऑफर कंपनीच्या सोलापूरसह इतर मार्गांवरही सुरू आहे.

सोलापूर-तिरूपती मार्गासाठी विश्वराज एव्हिएशनचे निवेदन

सोलापूर-तिरुपती या मार्गावर फ्लॉय ९१ या कंपनीने विमानसेवा सुरू करावी, या मागणीचे निवदेन विश्वराज एव्हिएशनच्या वतीने देण्यात आले आहे. सोलापूरहून मोठ्या संख्येने तिरुपतीला भाविक जातात. सध्या सोलापूरसह धाराशिव, लातूर व विजयपूर जिल्ह्यासाठी सोलापूर विमानतळ हा एकच पर्याय आहे. तिरुपतीकडे जाणाऱ्या रेल्वेची तिकिटे कायम फुल्ल असतात. विमानसेवा सुरू झाल्यास कमी वेळेत भाविकांना तिरुपती दर्शनाची सोय होऊ शकते, यासाठी विश्वराज चाकोते यांनी फ्लाय ९१ या विमान कंपनीला निवेदन दिले आहे.

मुंबईचा मुहूर्त नेमका कधी?

सोलापूर-मुंबई विमानसेवेबाबत अद्याप कोणतीही लेखी माहिती विमानतळ प्राधिकरणाकडे नाही. महाराष्ट्र एअरपोर्ट डेव्हलपमेंट कंपनीकडे मुंबईतील स्लॉट व इतर करारासंदर्भात स्टार एअर या कंपनीच्या वाटाघाटी सुरू आहेत. लवकरच सोलापूर-मुंबई मार्गावरील विमानसेवा सुरू होऊ शकते. मात्र, अजून किती दिवस लागतील या बद्दल नेमके सांगता येणार नाही, अशी माहिती सोलापूर विमानतळाच्या सहायक व्यवस्थापक अंजनी शर्मा यांनी दिली.

सोलापूरसह सर्वच मार्गांसाठी ऑफर

मॉन्सून ऑफर कंपनीकडून लागू करण्यात आली आहे. सोलापूरसह सर्वच मार्गावर ही ऑफर आहे. विमान कंपनीच्या संकेतस्थळावर याबद्दलची माहिती प्रसिद्ध करण्यात आलेली आहे.

- आशुतोष चिटणीस, वरिष्ठ वाणिज्य व्यवस्थापक, फ्लाय ९१, गोवा