६०० पैकी २०० बस रस्त्यावर ;आगारात २० खासगी चालकांची नियुक्‍ती

सोलापूर : एसटी महामंडळाचे राज्य शासनात विलिनीकरण करावे या मागणीसाठी मागील तीन महिन्यांपासून कर्मचाऱ्यांचा संप सुरूच आहे. दुसरीकडे जिल्ह्यातील एकूण नऊ आगारातून एसटीची वाहतूक हळूहळू सुरू झाली. मात्र सोलापूर विभागातील एकूण ६०० बसपैकी २०० गाड्या धावत असल्याची माहिती यावेळी एसटीच्या अधिकाऱ्यांकडून देण्यात आली.

राज्य परिवहन महामंडळाचे राज्य शासनात विलिनीकरण करावे या मुख्य मागणीसाठी एसटी कर्मचारी संपावर गेले आहेत. संपाला तीन महिने उलटून गेले तरीही कर्मचारी अद्यापही संपावर ठाम आहेत. एसटी प्रशासनाकडून सेवासमाप्ती, निलंबन, बडतर्फीसह अनेक प्रयत्नांनंतरही विलिनीकरण या मागणीच्या पूर्ततेसाठी संपकरी कर्मचारी आपल्या ध्येयापासून जराही विचलित झाले नाहीत. त्यामुळे प्रशासनाकडून खासगी चालकांची नियुक्‍ती करण्यात आली. सोलापूर आगारात एकूण २० खासगी चालकांची नियुक्‍ती करण्यात आल्याने एसटीच्या चाकांना गती मिळत आहे. दुसरीकडे एसटी कर्मचारी संपावर असल्याने एसटीचे मात्र मोठे आर्थिक नुकसान झाले आहे.

खासगी वाहतूकदारांना फायदा

विलिनीकरणाच्या प्रमुख मागणीवर संपकरी ठाम असून, आम्ही दुखवट्यात आहोत. आमच्या ६१ कर्मचाऱ्यांच्या मृत्यूचे बलिदान आम्ही वाया जाऊ देणार नाही असे त्यांचे म्हणणे आहे. आमच्यावर सुरू असलेला अन्याय दूर करून शासनाने आमच्या हक्काची मागणी मान्य करावी, अशी संपकरी कर्मचाऱ्यांची ठाम भूमिका आहे. ग्रामीण भागाची मोठी मदार एसटीवर असल्याने या भागाचा शहराशी संपर्क तुटला आहे. त्याचा मोठा फटका विद्यार्थ्यांना बसला असून, शेतकरी, रुग्णांना त्याची झळ पोहोचली आहे. याचा फायदा खासगी वाहतूकदार घेत असल्याचे पहायला मिळत आहे.

एसटी कर्मचारी मागील तीन महिन्यांपासून संपावर आहेत. दरम्यान, सध्या एसटीची वाहतूक हळूहळू वाढत असून, सहाशे बसपैकी दोनशे बस धावत आहेत. येत्या काळात आणखी गाड्या वाढविण्याचे नियोजन सुरू आहे.

- सुरेश लोणकर, विभागीय वाहतूक अधिकारी, सोलापूर