'शेतकऱ्यांनो, पीक पद्धत बदला अन्‌ डाळिब उत्पादक संघ तयार करा!'

मोहोळ (सोलापूर) : मोहोळ (Mohol) तालुक्‍यात डाळिंबाचे (Pomegranate) क्षेत्र मोठ्या प्रमाणात विस्तारले आहे. शेतकरी पिकवतो परंतु विकताना अडचणी येतात. त्यासाठी डाळिंब उत्पादक संघ तयार करा, त्यामुळे 'शेतकरी ते थेट ग्राहक' याप्रमाणे मालाची विक्री होईल. मधली साखळी आपोआप बंद होईल. शासनाकडे नोंदणी करा, शेतीच्या प्रगतीसाठी (Agricultural Progress) पीक पद्धतीत बदल करा, नवीन तंत्रज्ञानासह शेतकऱ्यांनी आता इंटरनेट सारख्या प्रगत माध्यमांचा वापर करावा, असा सल्ला कृषी उपसंचालक तुकाराम मोरे (Tukaram More) यांनी दिला.

कृषी विभाग व कृषी विज्ञान केंद्र, मोहोळ यांच्या संयुक्त विद्यमाने पापरी (ता. मोहोळ) येथे डाळिंबावरील खोड कीड व्यवस्थापन या विषयावर परिसंवाद चर्चासत्र व प्रक्षेत्र भेटीचे आयोजन केले होते, त्या वेळी उपसंचालक मोरे शेतकऱ्यांना मार्गदर्शन करत होते. या वेळी येथील शेतकरी दिगंबर गायकवाड यांच्या डाळिंब प्रक्षेत्रावर भेटीचे आयोजन केले होते. या वेळी तंत्र अधिकारी भारत कटके, तालुका कृषी अधिकारी अतुल पवार, कृषी विज्ञान केंद्राचे शास्त्रज्ञ डॉ पंकज मडावी, मंडळाधिकारी सूर्यकांत मोरे, शेतकरी रवी पाटील, पिंटू गायकवाड, विलास टेकळे, दादा गायकवाड, वामन भोसले, प्रताप भोसले, सतीश लोंढे, तानाजी घागरे, शिवाजी घागरे, कृषी पर्यवेक्षक जे. एस. भडकवाड, भरत सुरवसे, लामतुरे आदींसह परिसरातील शेतकरी मोठ्या संख्येने उपस्थित होते.

मोरे पुढे म्हणाले, चांगल्या दर्जाच्या फळे उत्पादनासाठी रासायनिक खतांचा वापर टाळा. ते वापरल्यामुळे उत्पादित माल टिकत नाही, तसेच तो एक्‍स्पोर्टही होत नाही. सर्व शेतकरी एकत्र या विचारांची देवाण- घेवाण करा. डाळिंब उत्पादक संघ स्थापनेची मोहोळ तालुक्‍यातून सुरुवात करू. आम्ही सर्वतोपरी मदत करू, असे अश्वासन मोरे यांनी दिले. या वेळी कृषी विज्ञान केंद्राच्या वतीने शेतकऱ्यांना फवारणीसाठी ट्रायकोडर्मा या बुरशी नाशकाचे वाटप करण्यात आले.