सोलापूर : लॉकडाउनमुळे गेल्या अडीच महिन्यांपासून बंद असलेल्या काही विडी कारखान्यांच्या ब्रॅंचमध्ये मंगळवारी सकाळच्या सत्रात विडी चेकर, सुवरवायझर, पान-तंबाखू देणाऱ्या कामगारांनी उपस्थिती लावली. या वेळी ब्रॅंचमध्ये साफसफाई व निर्जंतुकीकरण करण्यात आले. एकूणच विडी कारखान्यांत पुनरारंभाची तयारी सुरू असल्याचे चित्र आहे.
महापालिका आयुक्तांनी विडी कारखाने पुन्हा सुरू करण्याची परवानगी देताना कामगारांना कोरोनाचा संसर्ग होऊ नये म्हणन कारखानदारांनी कामगारांच्या घरोघरी जाऊन विड्या जमा करणे व पान-तंबाखू देण्याचा उपाय सुचवला. मात्र या उपायानुसार विडी कारखाने सुरू करणे हे कारखानदार व कामगारांसाठी खूपच जाचक व जिकिरीचे आहे, त्यामुळे जोपर्यंत प्रशासन पूर्वीप्रमाणेच कारखाने सुरू करण्याचे आदेश देत नाही, तोपर्यंत विडी कारखाने सुरू न करण्याचा निर्णय कारखानदारांनी घेतला आहे. सोमवारी पुणे विभागीय आयुक्त दीपक म्हैसेकर यांच्याशी व्हिडिओ कॉन्फरन्सद्वारे या विषयावर चर्चाही झाली. तेव्हा श्री. म्हैसेकर यांनी, प्रशासन स्तरावर चर्चा करून निर्णय घेण्याचे आश्‍वासन दिल्याने कारखानदारांना आशेचा किरण दिसून आला.
प्रशासनाच्या आदेशानुसार कारखाने जेव्हा व्हायचे तेव्हा सुरू होतील, तोपर्यंत ब्रॅंचमध्ये सुरक्षा नियमांच्या अधीन राहून तयारी पूर्ण करण्याची लगबग आता कारखान्यांमध्ये दिसून येत आहे. मंगळवारी (ता. 9) सकाळी पूर्वभागातील काही विडी कारखान्यांच्या ब्रॅंचमध्ये कामगार स्टाफने साफसफाईला सुरवात केली. सोशल डिस्टन्सिंगसाठी पांढरे चौकोनी पट्टे मारून घेण्यात आले. या वेळी ब्रॅंच व्यवस्थापकांनी स्टाफला प्रशासनाच्या सुरक्षा नियमांची माहिती दिली. स्वत:बरोबरच कामगारांच्या सुरक्षिततेच्या दृष्टीने करावयाच्या उपाययोजना स्पष्ट केल्या.
अशी असणार तयारी
कारखाने जेव्हा सुरू होतील तेव्हा होतील, मात्र सुरक्षा नियमांचे पालन यापुढे सर्वांनाच करावयाचे आहे. त्यामुळे काही कारखान्यांनी आपल्या कामगार स्टाफला बोलावून सुरक्षा नियमानुसार तयारी सुरू केली आहे. अशा प्रकारे सर्वच कारखानदार खबरदारी घेणार आहेत.
- बाळासाहेब जगदाळे,
प्रवक्ता, सोलापूर विडी उद्योग संघ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.