सबस्क्राईब करा
पंढरपूर - साडेतीन मुहूर्तांपैकी एक असलेल्या अक्षय तृतीयेचा सण यंदा शुक्रवारी (ता. १०) साजरा होणार आहे. अक्षय तृतीयेच्या सणासाठी येथील कृषी उत्पन्न बाजार समितीमध्ये बुधवारी (ता. ८) सुमारे चारशे ते साडेचारशे क्रेट केशर आंब्याची आवक झाली होती. या सणासाठी आंब्याला मोठी मागणी असल्यामुळे 'फळांचा राजा' आंबा बाजारामध्ये भाव खात असल्याचे चित्र दिसून आले.
अक्षय तृतीयेपासून आंबा खाण्याचा प्रघात असल्याने हा सण साजरा करण्यासाठी घरोघरी 'आमरस पुरीचा' बेत केला जातो. यंदा शुक्रवारी अक्षय तृतीयेचा सण आहे. या सणाच्या निमित्ताने येथील कृषी उत्पन्न बाजार समितीच्या आवारामध्ये आज सुमारे चारशे ते साडे चारशे क्रेट केशर आंब्याची आवक झाली होती.
आज झालेल्या लिलावामध्ये किरकोळ विक्रेत्यांनी आंबा चढाओढीने खरेदी केला. लिलावामध्ये प्रतवारीनुसार केशर आंब्याचे दर १०० ते १५० रुपये प्रति किलो होते. केशर आंब्याबरोबरच कर्नाटक व तेलंगणा राज्यातील तोतापुरी, बदाम, मल्लिका, लालबाग, कर्नाटकी हापूस आंब्याची देखील काही प्रमाणात आवक झाली होती. किरकोळ विक्रेत्यांनी लिलावामध्ये खरेदी केलेला आंबा येथील नवी पेठ भाजीबाजारामध्ये विक्री केला जात आहे.
नवीपेठ बाजारामध्ये केशर आंबा १५० ते २०० रुपये, लालबाग १०० ते १५० रुपये, बदाम ८० ते १०० रुपये, मल्लिका १२० ते १५० रुपये, कर्नाटकी हापूस १२० ते १५० रुपये तर तोतापुरी ६० ते ८० रुपये प्रति किलो प्रमाणे विक्री केला जात होता. अक्षय तृतीयेच्या सणासाठी आंब्याला मोठी मागणी असल्यामुळे आज बाजारामध्ये फळांचा राजा आंबा भाव खात असल्याचे चित्र दिसून आले.
साडेतीन मुहूर्तांपैकी एक अक्षय तृतीयेचा मुहूर्त -
वैशाख शुद्ध तृतीयेला अक्षय तृतीया असे म्हणतात. ग्रामीण भागामध्ये अक्षय तृतीयेला 'आखिती' असे देखील म्हणतात. अक्षय तृतीया हा साडेतीन मुहूर्तापैकी एक मुहूर्त आहे. गुढीपाडवा, बलिप्रतिपदा (पाडवा), दसरा आणि अक्षय तृतीया हे साडेतीन मुहूर्त आहेत. नवीन वर्षातील हा दुसरा मोठा सण असतो. अक्षय तृतीयेचे औचित्य साधून नागरिक सोने-चांदी, वाहने, घर, गृहोपयोगी वस्तू, इलेक्ट्रॉनिक्स उपकरणे आदींची खरेदी करतात. या दिवशी अनेक शुभ कार्यांचा प्रारंभ केला जातो.
देवगड व रत्नागिरी हापूस आंब्याचे दर अद्यापही प्रति डझन सहाशे ते हजार रुपयांच्या दरम्यान आहेत. कोकणातील हापूस आंब्याच्या तुलनेत स्थानिक केशर आंब्याचे दर सर्वसामान्यांच्या आवाक्यात आहेत. त्यामुळे केशर आंब्याला ग्राहकांकडून मोठी मागणी आहे.
- बाळासाहेब शेंबडे, आंबा अडत व्यापारी, पंढरपूर
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.