Ashti Sugar Factory : 'आष्टी शुगर' साखर कारखान्याने केला 2 हजार 700 रुपये प्रति टन दर जाहीर

मोहोळ - आष्टी, ता. मोहोळ येथील 'आष्टी शुगर' या साखर कारखान्याने गाळप हंगाम 2023/24 मध्ये गाळपास येणाऱ्या उसाला 2 हजार 700 रुपये प्रति टन दर जाहीर केल्याची माहिती कारखान्याच्या अध्यक्षा अंकिता पाटील-ठाकरे यांनी दिली. हा दर जिल्ह्यात उच्चांकी आहे.

या दरामुळे पावसा अभावी उसाच्या वजनात घट जरी झाली असली तरी गाळपास जाणाऱ्या उसाचे पैसे होणार आहेत. आर्थिक अडचणीच्या काळात शेतकऱ्यांना मोठा दिलासा मिळाला आहे.

चालू वर्षी पावसाळा पूर्णपणे कोरडा गेला आहे. त्यामुळे उसाची वाढच झाली नाही. परिणामी उसाच्या वजनात मोठी घट झाली आहे. शेतकऱ्यांच्या मागे कायमच संकटांची मालिका असते. जिल्ह्यात उसाची उपलब्धता नेहमीपेक्षा कमी आहे. त्या पार्श्वभूमीवर ऊस दराची स्पर्धा व्हावयास पाहिजे असे वातावरण आहे, मात्र तसे होताना दिसत नाही. आष्टी शुगर या साखर कारखान्याने गेल्या गाळात हंगामात उसाला प्रति टन 2 हजार 300 रुपये दर दिला आहे.

सध्या बाजारपेठेत साखरेचे दर वाढले आहेत. त्यामुळे शेतकऱ्यांच्या उसाला जादा दर देण्यास काही हरकत नाही. तसेच अपवाद वगळता अनेक साखर कारखान्याकडे उपपदार्थ निर्मिती आहे. अडचणीतील शेतकऱ्याला दिलासा देण्यासाठी आष्टी शुगर ने हा दराचा निर्णय घेतला आहे. शेतकऱ्यांमधून याचे स्वागत होत आहे. चालू गाळप हंगामात चार लाख मेट्रीक टन ऊस गाळपाचे उद्दिष्ट ठेवले आहे.

यावेळी कारखान्याच्या अध्यक्षा अंकिता पाटील-ठाकरे, कारखान्याचे संस्थापक अध्यक्ष तथा माजी सहकार मंत्री हर्षवर्धन पाटील, संचालिका भाग्यश्री पाटील, संचालक राजवर्धन पाटील, जनरल मॅनेजर संजीव गुरव, मुख्य अभियंता दीपक कळसाईत, चिफ केमिस्ट रामचंद्र समुद्रे, चीफ अकाउंटंट तुकाराम देवकते, शेती अधिकारी दीपक खटके, स्टोअर कीपर एस आर घाडगे व अन्य कर्मचारी उपस्थित होते.