सावधान...! मोहोळ तालुक्यातील खंडाळी परिसरात बिबट्या; बुधवारी रात्री वस्तीवर बांधलेल्या कुत्र्याला बिबट्याने नेले उचलून

सोलापूर : खंडाळी (ता. मोहोळ) येथील औदुंबर मारुती पवार यांच्या शेतातील बांधलेल्या पाळीव कुत्र्याला बुधवारी (ता. २१) रात्री बिबट्याने पळवून उसात नेले. या ठिकाणी आढळलेले ठशांची वन विभागाने पाहणी केली असता हे ठसे बिबट्याचे असल्याची खात्री पटली आहे.

खंडाळी (ता. मोहोळ) येथील ३३ केव्ही विद्युत उपकेंद्राजवळ औदुंबर मारुती पवार यांची शेती आहे. त्यांच्या वस्तीवर बुधवारी रात्री बांधलेल्या कुत्र्याला बिबट्याने उचलून नेल्याची घटना घडली. रात्री कुत्र्याच्या भूंकण्याच्या आवाजाने औदुंबर पवार यांना कुत्रा जोरजोराने भुंकत असलेले लक्षात आले. मात्र, वीजपुरवठा बंद असल्याने अंधारात काही दिसले नाही. गुरुवारी सकाळी पाहिले असता. त्यांच्या बांधलेल्या कुत्र्याची साखळी तुटलेली आढळून आली. तसेच परिसरात पावसामुळे मोठ्या प्राण्याचे ठसे आढळले त्यांनी हे ठसे फोटो काढून वन विभागाला पाठविले असता, ते बिबट्याचेच ठसे असल्याचे समोर आले आहे. परिसरातील नागरिकांनी सतर्क रहावे, असे आवाहन वन विभागाकडून करण्यात आले आहे.

बिबट्याचा वावर आढळला, लोकांनी सावध राहावे

वन रक्षक अभिषेक कापसे यांनी येथे येऊन पाहणी केली असता हे ठसे बिबट्याचे असून बिबट्या उसात गेल्याचे लक्षात आले. जवळ ऊस केळी व इतर पिके आहेत. यामुळे बिबट्या नेमका कुठे लपला आहे, हे लक्षात आले नाही. मात्र, वनरक्षक कापसे यांनी येथील शेतकऱ्यांनी बिबट्यापासून पाळीव प्राण्याचा व स्वत:चा कसा बचाव करावा, याची माहिती दिली. या परिसरात यापूर्वी अनेक वेळा बिबट्याचा वावर आढळलेला आहे.