काँग्रेस शहराध्यक्षांचे पंतप्रधान मोदींना आव्हान! PM केअर फंड, राफेलचीही ईडीने करावी चौकशी

सोलापूर : देशाला सर्वस्व अर्पण केलेल्या गांधी परिवाराला अडचणीत आणण्यासाठी मोदी सरकार सूडबुद्धीने कारवाई करीत आहे. त्याविरोधात शुक्रवारी (ता. १७) शहर व जिल्हा काँग्रेसतर्फे माजी केंद्रीय गृहमंत्री सुशीलकुमार शिंदे, प्रदेश कार्याध्यक्षा आमदार प्रणिती शिंदे यांच्या मार्गदर्शनाखाली जिल्हाधिकारी कार्यालयासमोर निदर्शने करण्यात आली.

काँग्रेस पदाधिकारी व कार्यकर्त्यांनी ईडी व मोदी सरकारचा पुतळा जाळण्याचा प्रयत्न या आंदोलनावेळी केला. मोदी सरकारविरोधात घोषणाबाजी केली. ‘मोदी सरकार हमसे डरती है, ईडी को आगे करती है’, ‘नही चलेगी, नहीं चलेगी, मोदी 'तेरी हिटलरशाही नही चलेगी’, ईडी व तपास यंत्रणांचा गैरवापर बंद करा, ईडीचा पोपट म्हणून उपयोग करणाऱ्या मोदी सरकारचा धिक्कार असो, राहुलजी गांधी तुम संघर्ष करो- हम तुम्हारे साथ है, अशा घोषणांनी परिसर दणाणून निघाला. यावेळी शहराध्यक्ष वाले, माजी आमदार निर्मला ठोकळ, कार्याध्यक्ष संजय हेमगड्डी, मनोज यलगुलवार, माजी गटनेते चेतन नरोटे, बाळासाहेब शेळके, दादासाहेब साठे, प्रदेश चिटणीस किसन मेकाले, नरसिंह आसादे, मनीष गडदे, माजी महापौर अलका राठोड, विनोद भोसले, प्रवीण निकाळजे, शिवलिंग बाटलीवाला, अनुराधा काटकर, भिमाशंकर जमादार, अर्जुनराव पाटील, सुधीर लांडे, युवक जिल्हाध्यक्ष सुनंजय पवार, शहराध्यक्ष गणेश डोंगरे, भीमराव बाळगे, तालुकाध्यक्ष शालिवाहन माने-देशमुख, उमेश सुरते, अंबादास करगुळे, केशव इंगळे, तिरुपती परकीपंडला, अशोक देवकते आदी उपस्थित होते.

शहराध्यक्ष प्रकाश वाले म्हणाले...
‘ज्या गांधी परीवाराने देशासाठी बलिदान दिले, त्या परिवारातील काँग्रेसच्या अध्यक्षा सोनिया गांधी व राहुल गांधींना नॅशनल हेराल्ड प्रकरणात ईडीची नोटीस पाठवून नाहक त्रास दिला जात आहे. चौकशीच्या नावाखाली तीन दिवस राहुल गांधींचा छळ केला. मोदी सरकारची ही दडपशाही काँग्रेसचा कार्यकर्ता सहन करणारा नाही. ईडी खरोखरच काम करत असेल, तर किरीट सोमय्या व भाजपवाल्यांनी अनेक नेत्यांवरील आरोपांचीही चौकशी करावी. देशभरात भाजपचे हजारो कोटींचे ऑफिस निर्माण केले. त्यासाठी पैसा कुठून आला, पीएम केअर फंड व राफेलच्या दलालीची देखील ईडीतर्फे चौकशी करावी’.