सोलापूर 'सिव्हिल'मधील डॉक्‍टर्स व कर्मचारी कोरोना पॉझिटिव्ह

सोलापूर : शहरामध्ये बुधवारी तब्बल 139 कोरोनाचे (Covid-19) रुग्ण आढळून आले आहेत. धक्कादायक बाब म्हणजे, यामध्ये 36 पॉझिटिव्ह रुग्ण हे केवळ छत्रपती शिवाजी महाराज सर्वोपचार रुग्णालयात (Chhatrapati Shivaji Maharaj Sarvopcahr Rugnalaya) (Civil Hospital) काम करणारे डॉक्‍टर्स (Doctor) आणि कर्मचारी असल्याची माहिती समोर आली आहे. सोलापुरातील कोरोना रुग्णांची संख्या पाहता शहर व जिल्हा तिसऱ्या लाटेकडे जात असल्याचे चित्र दिसत आहे. मोठ्या झपाट्याने कोरोनाचा संसर्ग वाढत आहे. सोलापूर शहर आणि जिल्ह्यामध्ये मागील दहा दिवसांमध्ये कोरोनाच्या रुग्णांमध्ये मोठी वाढ झाली आहे. (Corona report of doctors and staff of Civil Hospital has come positive)

याबाबत सिव्हिल हॉस्पिटल सूत्रांकडून अधिक माहिती घेतली असता सिव्हिल हॉस्पिटलमध्ये काम करणाऱ्या डॉक्‍टर आणि कर्मचाऱ्यांना कोरोनाचा संसर्ग झाला असला तरी कुणाचीही प्रकृती गंभीर नाही, सर्व सुरक्षित आहेत. काही जणांना सिव्हिलमध्ये ऍडमिट करण्यात आले असून काहीजण होम आयसोलेट (Home Isolation) आहेत. तर ग्रामीण भागामध्ये तब्बल 142 नवीन रुग्ण सापडले आहेत, त्यामध्ये बार्शीतील (Barshi) 43 नव्या रुग्णांची भर पडली आहे.

शहरात बुधवारी विविध प्रभागांतील कोरोनाचा 938 जणांचा रिपोर्ट आला असून, यात 139 पॉझिटिव्ह आले तर तीन रुग्ण बरे होऊन घरी परतले. शहरातील ऍक्‍टिव्ह रुग्णांची संख्या 441 आहे. तर ग्रामीणमधील 1259 जणांचा अहवाल आला असून, यात 142 जण पॉझिटिव्ह आले आहेत. बरे होऊन घरी गेलेल्यांची संख्या 29 असून, ऍक्‍टिव्ह रुग्णांची संख्या 462 झाली आहे. सध्या शहर व ग्रामीणमधील एकूण रुग्णांची संख्या 903 झाली आहे. शहर व ग्रामीणमध्ये एकाही रुग्णाचा मृत्यू झाला नाही.