22 फुटवे अन्‌ 50 कांड्यांचा ऊस! अडीच एकरात 241 टन उत्पादन | Solapur | Sakal
sakal

बोलून बातमी शोधा

22 फुटवे अन्‌ 50 कांड्यांचा ऊस! अडीच एकरात 241 टन उत्पादन
22 फुटवे अन्‌ 50 कांड्यांचा ऊस! अडीच एकरात 241 टन उत्पादन

22 फुटवे अन्‌ 50 कांड्यांचा ऊस! अडीच एकरात 241 टन उत्पादन

उपळाई बुद्रूक (सोलापूर) : सातत्याने दुष्काळ, गेल्या दोन वर्षांपासून कोरोना (Covid-19) महामारीचे संकट, त्यात अतिवृष्टी (Heavy Rain) अशा एक ना अनेक संकटांनी शेतकरी वारंवार संकटात सापडला आहे. त्यामुळे शेती करणे म्हणजे एक आव्हानच निर्माण झाले आहे. पण शेतकऱ्याकडे मेहनत करायची जिद्द असेल, अन्‌ नावीन्यपूर्ण कल्पनांद्वारे शेती केल्यास विक्रमी उत्पादन घेता येते, हे उपळाई बुद्रूक (ता. माढा) (Madha) येथील शेतकरी संतोष जाधव (Santosh Jadhav) यांनी दाखवून दिले आहे. त्यांनी अवघ्या अडीच एकरात 241 टन उसाचे (Sugarcane) उत्पन्न घेतले आहे.

हेही वाचा: कोरोना अंगावर काढू नका! 23 वर्षीय तरुणीची नऊ दिवसांची झुंज संपली

उपळाई बुद्रूक हा कायमस्वरूपी दुष्काळी पट्टा. परंतु गेली दोन ते तीन वर्षांपासून या भागात सीना- माढा उपसा सिंचन योजनेतून पाणी पोचत आहे. त्यामुळे या भागातील शेतकरी ऊस लागवड, बागायतीकडे वळला आहे. यंदा मोठ्या प्रमाणावर या भागात शेतकऱ्यांनी ऊस लागवड केली आहे. त्यातीलच एक म्हणजे शेतकरी संतोष जाधव. पुरेसे पाणी उपलब्ध झाल्याने त्यांनी दीड वर्षापूर्वी पहिल्यांदाच उसाची लागवड करण्यासाठी शेतीची पूर्ण मशागत करून ऊस लागवडीचे नियोजन केले. यामध्ये ऊस बेणे गोल्डन 86032 ची लागवड त्यांनी सरी पद्धतीने चार बाय चार अंतरावर दोन डोळे, ऊस बेण्याची लागवड केली होती. ऊस पिकांच्या उगवणीनंतर 20 ते 25 दिवसांनी रासायनिक खताचा पहिला डोस त्यांनी दिला.

स्वतःचे वैयक्तिक कौशल्य वापरत त्यांनी योग्य नियोजन केल्याने उसावर कीड, माशी, पांढरी माशी या कोणत्याही रोगाचा प्रादुर्भाव झाला नाही. पहिल्यांदा रासायनिक खते व नंतर कोंबडी खताचा वापर त्यांनी केला. 'कष्ट दमदार असेल तर पीक जोमात येते' म्हणतात ना तसेच संतोष जाधव यांच्या कष्टाचे चीज झाले असून, त्यांच्या उसाच्या एका बुडास जवळपास 22 उसाचे फुटवे होऊन 50 काड्यांचा ऊस निघाला आहे. साधारणपणे एका उसाचे वजन नऊ किलोपर्यंत आहे. अडीच एकर ऊस लागवडीचा पूर्ण खर्च त्यांना एक लाख रुपयांच्या आसपास झाला असून, उसाचे एकरी 100 टनाचे विक्रमी उत्पन्न त्यांनी घेतले आहे. अडीच एकरात 241 टन ऊस उत्पादन संतोष जाधव यांनी घेतले आहे. उसाची संपूर्ण देखभाल संतोष जाधव यांच्यासह आई, पत्नी, मुलांनी केली आहे. सध्याचा कारखाना भाव अंदाजे धरल्यास सहा लाख रुपयांच्या आसपास उत्पन्न त्यांना मिळाले आहे. कमी खर्चात अधिक उत्पादन घेतल्याने व 50 कांड्यांचा ऊस असल्याने परिसरात या शेतकऱ्याच्या उसाची चांगलीच चर्चा आहे.

हेही वाचा: एसटी महामंडळ 'या'मुळे खड्ड्यात! 700 बस खरेदीची निविदा

पहिल्यांदाच उसाची लागवड केली. पै-पाहुण्यांचे यात बरेच मार्गदर्शन झाले. चांगले उत्पन्न मिळाल्याने, कुटुंबीयांनी केलेल्या कष्टाचे फळ मिळाले आहे. इतके टन उसाचे उत्पादन मिळाल्याने समाधान व आनंद वाटतोय.

- संतोष जाधव, शेतकरी, उपळाई बुद्रूक

loading image
go to top