"जनहित'चा धसका घेत "गोकूळ'ने दिले एफआरपी व कर्मचाऱ्यांचे पीएफ जमा करण्याचे लेखी आश्‍वासन 

दक्षिण सोलापूर (सोलापूर) : जनहित शेतकरी संघटनेतर्फे गव्हाणीत उड्या टाकून धोत्री (ता. दक्षिण सोलापूर) येथील गोकूळ साखर कारखाना बंद पाडण्याचा इशारा देण्यात आला होता. त्याचा धसका घेत कारखाना प्रशासनाने ऊस उत्पादक शेतकऱ्यांची थकीत एफआरपी व कर्मचाऱ्यांच्या पीएफची रक्कम 1 जानेवारीपर्यंत जमा करण्याचे लेखी आश्‍वासन संघटनेला दिल्याने होणारे आंदोलन स्थगित करण्यात आले. 

गोकूळ साखर कारखान्याने ऊस उत्पादक शेतकऱ्यांची गेल्या वर्षीची थकीत एफआरपी तसेच कारखान्यातील कामगारांच्या पगारी व पीएफची रक्कम अद्याप जमा न केल्याने जनहित शेतकरी संघटनेचे संस्थापक- अध्यक्ष प्रभाकर देशमुख यांनी सोमवारी जिल्हाधिकारी मिलिंद शंभरकर यांना निवेदन दिले होते. या निवेदनात शुक्रवार (ता. 18) गोकूळ कारखान्यावर आंदोलन करून कारखाना बंद पाडण्याचा इशारा देण्यात आला होता. परंतु कारखाना प्रशासनाने या आंदोलनाचा धसका घेत 28 डिसेंबरपर्यंत एफआरपीचे सर्व थकीत पैसे जमा करण्याचे व कर्मचाऱ्यांची उर्वरित देयके 1 जानेवारीपर्यंत जमा करण्याचे लेखी स्वरूपातील आश्वासन दिल्यामुळे आंदोलन स्थगित करण्यात आल्याचे श्री. देशमुख यांनी सांगितले. 

या वेळी विकास जाधव, चंद्रकांत निकम, श्रीकांत नलवडे, गुंजेगावचे सुभाष पवार, विकास पाटील, रवी पाटील, वडापूरचे अण्णासाहेब वाघचौरे, संभाजी बाबर, खंडू कदम, सुनील पुजारी, धर्मराज पुजारी, सुरेश म्हमाणे, कोरवलीचे शशिकांत थोरात आदींसह कार्यकर्ते उपस्थित होते. 

...तर कारखाना बंद पाडू 
गेल्या तीन महिन्यांपासून जनहित संघटना आंदोलनाद्वारे सातत्याने पाठपुरावा करत आहे. तरी याबाबतीत गोकूळचे संचालक दत्ता शिंदे यांनी दखल घेऊन लेखी स्वरूपात आश्वासन दिल्यामुळे होणारे आंदोलन थांबवले. परंतु 1 जानेवारीपर्यंत जर एफआरपीची रक्कम व कामगारांच्या पगारी जमा केल्या नाहीत, तर गोकूळ कारखान्यात घुसून कारखान्याच्या गव्हाणीत उड्या टाकून कारखाना बंद पाडला जाईल. 
- प्रभाकर देशमुख, 
संस्थापक - अध्यक्ष, जनहित शेतकरी संघटना 

संपादन : श्रीनिवास दुध्याल