अक्कलकोटमध्ये पावसाची दमदार हजेरी 

अक्कलकोट(सोलापूर)ः शहर व परिसरात आज सायंकाळी सहा वाजण्याच्या सुमारास पुनर्वसू नक्षत्राच्या पावसाने दमदार हजेरी लावली. सुमारे एक तासभर पडलेल्या पावसामुळे वातावरणात गारवा निर्माण झाला. या पावसाने हजेरी लावल्याने पेरण्या झालेल्या सर्व पिकांना फायदा होणार आहे. 

हेही वाचाः माळशिरस तालुक्‍यात या भागातही कोरोनाने केली एन्ट्री 

आज दिवसभर शहरात ढगाळ वातावरण होते. सायंकाळी सुमारास पावसाने सुमारे एक तासभर दमदार हजेरी लावली. यामुळे सर्वत्र पाणीच पाणी झाले. अनेक गटारी मध्ये गाळ तुंबल्याने पाणी रस्त्यावर वाहत होते. 

हेही वाचाः ब्रेकींगः दुकानांना वेळ वाढवून देण्यास पंढरपूर व्यापारी कमिटीचाच विरोध 

पावसाने हजेरी लावल्याने पेरण्या झालेल्या तूर, उडीद, मूग, बाजरी, तीळ, भुईमूग आदी पिकांना फायदा होणार आहे. सध्या सूर्यफुलाच्या पेरणी सुरू असल्याने त्याला सुद्धा हा पाऊस उपयोगी पडणार आहे. ग्रामीण भागात शेतकऱ्यांना शेतीचे काम करण्यासाठी जाताना,बी बियाणे व खते खरेदीसाठी जनता कर्फ्यु असल्यामुळे बाहेर पडता येत नाही. त्यामुळे शेतकऱ्यांनी थोडा त्रास होत आहे. पण पोलिस खाते शेतकऱ्यांना शेतीच्या कामासाठी शेतात जाण्यासाठी सवलत देत आहे. 
मृग, आद्रा नंतरच्या या पुनर्वसु नक्षत्राच्या दमदार पावसामुळे जमिनीतील पाण्याची पातळी वाढण्याची शक्‍यता आहे. अशाच प्रकारे आणखी दोन तीन दमदार पाऊस पडल्यास जमिनीतील जलस्तर वाढून विहिरी व विंधन विहिरींना फायदा होईल. 

सर्वच नक्षत्रामध्ये पावसाची हजेरी 
यावर्षी तीन नक्षत्रामध्ये पावसाने जोरदार हजेरी लावली आहे. त्याचा उपयोग शेती हंगामाला चांगल्या पध्दतीने होणार आहे. 
- दत्तूकुमार साखरे, प्रगतशील शेतकरी 
 

संपादनः प्रकाश सनपूरकर