अपघात होणार कमी! ‘ट्रायल’पूर्वी वाहनचालकांना रोडसेफ्टी व्हिडिओ पाहण्याचे बंधन

सोलापूर : वाहनाचा परवाना काढण्यापूर्वी उपप्रादेशिक परिवहन विभागाकडून संबंधित चालकाची ट्रायल घेतली जाते. परंतु, वाढते अपघात रोखण्यासाठी आता त्याच शिकाऊ वाहनचालकाला अर्ध्या तासाचा रोडसेफ्टीचा व्हिडिओ पाहणे बंधनकारक करण्यात आले आहे.सोलापूर शहर हद्दीत २१ अपघातप्रवण ठिकाणे आहेत. दरवर्षी सोलापूर शहर परिसरात सरासरी ५५ जणांचा अपघाती मृत्यू होतो. तर ग्रामीण भागात अपघाप्रवण ठिकाणांची संख्या (ब्लॅकस्पॉट) ३७ आहे. जानेवारी ते जुलै २०२२ या काळात सोलापूर ग्रामीण हद्दीत विशेषत: महामार्गांवर जवळपास सहाशे रस्ते अपघात झाले आहेत.

त्यात ३४० हून अधिक जणांचा मृत्यू झाला आहे. ब्लॅकस्पॉट असो वा अपघाती मृत्यूमध्ये सोलापूर जिल्हा राज्यातील टॉपटेन जिल्ह्यांमध्ये आहे. अनेकदा बेशिस्त वाहनचालकांवर दंडात्मक कारवाई करूनही वाहतूक नियमांचे पालन केले जात नाही. परिवहन आयुक्तालयाने आता दंडाची रक्कम वाढविली, तरीपण काहीही फरक पडलेला नाही. विनाहेल्मेट दुचाकी तर सीटबेल्ट न घालता वाहन चालविणे, वाहनांचा अतिवेग, मद्यपान करुन वाहन चालविणे, विरुध्द दिशेने वाहन चालवणे आणि लेन कटिंग ही जीवघेण्या अपघाताची प्रमुख कारणे आहेत. त्यासंदर्भातील माहिती आता सेफ्टी व्हिडिओतून दाखविली जात आहे. दंडात्मक कारवाई करताना आता कोणी वाहतूक नियम मोडला तर ते वाहन जप्त करून संबंधित वाहनचालकाला तो व्हिडिओ दाखविला जाणार आहे.

व्हिडिओतील ठळक बाबी

घाट वळणात वाहनाचा वेग किती असावा, त्याठिकाणी वाहन कसे चालवावे

टोल नाकाजवळ आल्यानंतर वाहनाचा वेग किती असावा

वाहनाची निगा कशी राखावी, त्याचा फायदा काय होतो

रस्त्यावरून पादचारी किंवा शाळकरी मुले पायी जात असल्यास वाहन कसे चालवावे

लेन कटिंगसह अन्य नियम मोडल्यास अपघात कसा होतो, याची माहिती

अर्चना गायकवाड, उपप्रादेशिक परिवहन अधिकारी, सोलापूर

"शिकाऊ वाहनचालकाच्या ताब्यात प्रत्यक्ष वाहन देण्यापूर्वी ‘सिम्युलेटर’ प्रणालीवर त्यांना वाहन चालविण्याची प्रॅक्टिस करता येते. तशी सोय आरटीओ कार्यालयात उपलब्ध करून देण्यात आली आहे. चालक प्रबोधन कक्षदेखील सुरु करण्यात आला आहे. रस्ते अपघात रोखणे हाच त्यामागील प्रमुख हेतू आहे."