मोहोळ तालुक्यात 65 हजार जनावरांचे लंपी च्या पार्श्वभूमीवर लसीकरण

मोहोळ : "लंपी" चा प्रादुर्भाव होऊ नये म्हणून मोहोळ तालुका पंचायत समितीच्या पशुवैद्यकीय विभागाने कंबर कसली असून गेल्या आठवड्या पासून तालुक्यातील 65 हजार जनावरांचे लसीकरण झाले आहे. मंगळवार ता 28 रोजी लसीकरणासाठी तालुक्याला 50 हजार लसीं च्या मात्रा उपलब्ध झाल्याची माहिती पशुधन विकास अधिकारी डॉ प्रदीप नवरे यांनी दिली.

या संदर्भात अधिक माहिती देताना डॉ रणवरे म्हणाले, मोहोळ तालुक्यात अद्यापावेतो लंपी चा प्रादुर्भाव झाला नाही. मात्र तो होऊच नये म्हणून डॉ रणवरे व तालुक्यातील त्यांच्या इतर सहकारी डॉक्टरांनी गेल्या आठवड्या पासून लसीकरण सुरू केले आहे. तालुक्यात एक लाख गायींची संख्या आहे. त्यापैकी 65 हजार गाईंचे व इतर जनावरांचे लसीकरण झाले आहे. लसीकरण करण्यासाठी मात्र डॉक्टरांची संख्या कमी पडत आहे. वटवटे व जामगाव या परिसरात दोन जनावरांना लंपी सदृश्य रोगांची लक्षणे दिसू लागली होती मात्र त्या भागात तातडीने लसीकरण केल्याने प्रादुर्भाव टाळला आहे.

दरम्यान तालुक्यातील जनावरांच्या लसीकरणा साठी वरिष्ठाकडे 50 हजार लसीं ची मागणी केली होती ,ती मंगळवारी उपलब्ध झाल्याचे डॉ रणवरे यांनी सांगितले. सध्या मोहोळ तालुक्यातील पशुवैद्यकीय विभागाकडे डॉक्टरांच्या जागा रिक्त आहेत, त्यासाठी खाजगी वैद्यकीय व्यवसाय करणाऱ्या डॉक्टरांना तात्पुरत्या स्वरूपात नेमून त्यांना प्रति लस पाच रुपये कमिशन देण्यात येणार आहे. त्यामुळे लसीकरणाच्या कामाला वेग येणार असून लंपी चा प्रादुर्भाव थांबणार आहे. उर्वरित सुमारे 35 हजार जनावरांचे लसीकरण लवकरच पूर्ण करणार असल्याचे डॉ रणवरे यांनी सांगितले. गावोगावी सध्या मोफत लसीकरण सुरू आहे प्रत्येकाच्या शेतात जाणे शक्य नाही, त्यासाठी शेतकऱ्यांनी जनावरे गावात आणून लसीकरणाला सहकार्य करण्याचे आवाहन पशुवैद्यकीय विभागाकडून करण्यात आले आहे.