करकंब (सोलापूर) : त्यांच्या घरातील सर्वांना कोरोनाची लागण... सर्वजण पंढरपूर येथे विलगीकरण कक्षात... नाही म्हणायला घरात एकटी 60 वर्षांची आजी... पण तिचाही घरातच कोरोनाने मृत्यू... गावातील कोणीही जवळ जायलाही धजावेना... पोलिस पाटलाची करकंब पोलिस ठाण्यात वर्दी... मग काय, कोरोना काळात देव बनून रस्त्यावर उतरलेली खाकी वर्दी येथे मरणानंतरही मदतीला धावून आली आणि स्वतःचा जीव धोक्यात घालून पोलिसांनीच उरकला त्या मृत आजीचा अंत्यविधी !
ही घटना काल (रविवारी) सांगवी (ता. पंढरपूर) येथे घडली. मृत आजीचे संपूर्ण कुटुंब कोरोना बाधित असल्याने सर्वजण पंढरपूर येथे विलगीकरण कक्षात उपचारासाठी दाखल आहेत. त्यामुळे आजीच्या अंत्यविधीसाठी त्यांना जाता येईना. गावात आजीच्या अंत्यविधीकरिता कोणीही पुढे येत नव्हते. अशा परिस्थितीत करकंब पोलिस ठाण्याचे पोलिस उपनिरीक्षक महेश मुंडे, सिरमा गोडसे, अमोल घुगे आदींनी पुढाकार घेऊन घटनास्थळी धाव घेतली. कोरोनाच्या धास्तीने अंत्यविधीसाठी कोणीही पुढे येत नसल्याने त्यांनी मृताचे जवळचे नातेवाईक सून व जावई यांना बोलावून घेऊन त्यांच्या उपस्थितीत सर्व सोपस्कार पार पाडत स्वतःच अंत्यविधी उरकला.
कोरोनामुळे सध्याची परिस्थिती अतिशय भयानक बनली आहे. एकीकडे लस, इंजेक्शन, ऑक्सिजनचा तुटवडा असताना रुग्णांची संख्या झपाट्याने वाढत आहे. मृत्यूचेही प्रमाण वाढताना शेवटच्या क्षणी आप्तस्वकीयही जवळ नसणे हे खूपच वेदनादायी आहे. अशा परिस्थितीत पोलिस सर्वच पातळ्यांवर जीवाची बाजी लावून काम करत आहेत. नागरिकांनीही आता तरी स्वतःची जबाबदारी ओळखून सर्वतोपरी खबरदारी घ्यावी.
- प्रशांत पाटील, सहायक पोलिस निरीक्षक
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
