सोलापूर : बार्शीत भरदिवसा वृद्ध महिलेला लुटले

बार्शी : भाऊजयीच्या वर्षश्राद्धासाठी कळमण येथून बार्शी बसस्थानकावर उतरुन बार्शीतील भावाच्या घरी जात असताना दुचाकीवर आलेल्या भामट्याने वृद्ध महिलेस आजी तुला घरी सोडतो, असे सांगून दुचाकीवरुन नेऊन सोन्याचे दागिने व कर्णफुले काढून घेऊन भरदिवसा ६५ हजार रुपयांचा ऐवज लंपास केला. याप्रकरणी बार्शी शहर पोलिस ठाण्यात गुन्हा दाखल झाला आहे.

सरस्वती जालिंदर शिंदे (वय ७५, रा. कळमण, ता. उत्तर सोलापूर) या वृद्ध महिलेने अज्ञात तरुणाविरोधात गुन्हा दाखल केला असून ही घटना बार्शी एसटी बसस्थानकासमोर दुपारी दीडच्या दरम्यान घडली. शिंदे या दुपारी साडेबाराच्या दरम्यान बीबीदारफळ येथून निघून बार्शी येथील बस स्थानकावर दुपारी दीडच्या दरम्यान आल्या.

बसस्थानकाबाहेर केळीच्या हातगाडीवर केळी घेऊन रिक्षा चालकास बोलावीत असताना एक तरुण त्यांच्या जवळ आला. आजी तू मला ओळखले का, खूप दिवस मी पुण्यात होतो, तुला घरी सोडतो, असे म्हणून त्याने मला दुचाकीवर बसवले आणि तुळजापूर रस्त्याने घेऊन गेला. थोडे गावाबाहेर जाताच त्या तरुणाने मला सांगितले. पुढे चोरटे आहेत सोने काढून ठेव त्यांनी पाहिले तर आपल्याला सोडणार नाहीत. तीन ग्रॅम सोन्याची माळ, आठ ग्रॅमची शंभर मण्यांची माळ, दोन ग्रॅमची कर्णफुले व रोख तीनशे रुपये पाकिटात ठेवण्यास सांगितले व ते पाकीट तरुणाने गावाबाहेर शेतातील रस्त्यावर नेऊन बळजबरीने माझ्याकडून काढून घेतले.

दुचाकीवरुन ढकलून देऊन खाली पाडले व निघून गेला, असे फिर्यादीत म्हटले आहे. तपास पोलिस उपनिरीक्षक गजानन कर्णेवाड करीत आहेत.