Solapur News: दहावीचे पेपर अवघड जात असल्याने शाळकरी मुलीची आत्महत्या

Solapur News : दहावीचे पेपर अवघड जात असल्याने काजल बाळू बनसोडे (वय 16) या शाळकरी मुलीने गळफास लावून घेतलेली घटना मरवडे (ता.मंगळवेढा) येथे रविवारी दुपारच्या सुमारास घडली आहे. या घटनेने मरवडे परिसरात खळबळ उडाली आहे.

या घटनेची माहिती मयत काजल बनसोडे हिचे मामा विलास लक्ष्मण कांबळे (सलगर बु. ता.मंगळवेढा) यांनी मंगळवेढा पोलीस ठाण्यात दिली आहे. विलास कांबळे यांच्या बहीण जयश्री बाळू बनसोडे या मरवडे येथे राहत असून त्यांचे पती बाळू बनसोडे यांचे गेल्या सहा वर्षांपूर्वीच निधन झाले आहे. त्यांच्यासोबत मुलगा विशाल व मुलगी काजल राहत होते.

काजल ही इयत्ता दहावी मध्ये शिकत होती. दि.02 मार्च पासून सुरुवात झालेले दहावीचे बोर्ड पेपर अवघड जात असल्याचे तिने आपल्या आईकडे सांगितले होते. तिचे अद्यापपर्यंत तीन पेपर झाले होते तर आणखी सहा पेपर होणे बाकी होते. रविवारी दि.13 मार्च रोजी सकाळी आठ वाजता आई जयश्री व भाऊ विशाल हे कामावर गेले होते.

दुपारी एक वाजता कामावरून परत आल्यानंतर काजल हिने घरात पत्र्याच्या छताला असलेल्या अँगलला दोरीच्या साह्याने गळफास घेतल्याचे आढळून आले. तिचा गळफास सोडून उपचाराला घेऊन जात असताना ती मयत झाली असल्याचे लक्षात आले.

या प्रकरणी मंगळवेढा पोलीस ठाण्यात अकस्मात मृत्यूची नोंद करण्यात आली असून या घटनेचा अधिक तपास पोलीस नाईक ईश्वर दुधाळ हे करत आहेत. दहावी शिकणाऱ्या काजल बाळू बनसोडे हिने परीक्षा कालावधी सुरू असताना अभ्यासाच्या तणावातून गळफास घेऊन आत्महत्या केल्याने मरवडे परिसरातील ग्रामस्थांमधून हळहळ व्यक्त केली जात आहे.