शेतकऱ्याने मागितली थेट मुख्यमंत्र्यांकडेच आत्मदहनाची परवानगी!

पंढरपूर (सोलापूर) : पटवर्धन कुरोली ते पेहे (ता. पंढरपूर) (Pandharpur) या ग्रामीण मार्गावरील अतिक्रमण काढून रस्ता मोकळा करावा, या मागणीसाठी पटवर्धन कुरोली येथील शेतकरी (Farmers) शंकर सावंत (Shankar Sawant) व त्यांच्या कुटुंबीयांनी थेट मुख्यमंत्री उद्धव ठाकरे (Uddhav Thackeray) यांच्याकडे कैफियत मांडत आत्मदहनास परवानगी द्यावी, अशी मागणी केली आहे. शेतकरी शंकर सावंत यांच्या मागणीनंतर पंढरपूर तालुक्‍यात मोठी खळबळ उडाली आहे.

पंढरपूर ते पेहे या दोन गावांना जोडणाऱ्या रस्त्यावर पटवर्धन कुरोली ग्रामपंचायत हद्दीमध्ये काही स्थानिक शेतकऱ्यांनी अतिक्रमण केले आहे. त्यामुळे रहदारीस अडथळा निर्माण झाला आहे. रस्ता अतिक्रमण मुक्त करावा, या मागणीसाठी सावंत कुटुंबीयांनी स्थानिक शेतकरी व ग्रामपंचायतीच्या विरोधात लढा उभारला आहे. शंकर सावंत यांच्या

मागणीनुसार रस्त्याची मोजणी देखील केली. त्यामध्येही शेतकऱ्यांनी अतिक्रमण केल्याचे समोर आले आहे. त्यानंतरही रस्त्यावरील अतिक्रमण कायम आहे. रस्ता अतिक्रमण मुक्त करावा, या मागणीसाठी शंकर सावंत यांच्यासह इतर शेतकऱ्यांनी थेट मुख्यमंत्री उद्धव ठाकरे यांच्याकडेच लेखी तक्रार केली आहे.

स्थानिक शेतकऱ्यांनी अतिक्रमण केल्यामुळे शासकीय रस्ता गायब झाला आहे. या संदर्भात स्थानिक ग्रामपंचायत आणि महसूल प्रशासनाकडे तक्रारी केल्या आहेत. परंतु, अद्याप दखल घेतली नाही. येथील रस्ता अतिक्रमण मुक्त करा किंवा आम्हाला आत्मदहन करण्याची परवानी द्या, अशी विनंती येथील शेतकऱ्यांनी मुख्यमंत्र्यांना पाठवलेल्या लेखी तक्रारीत केली आहे. थेट मुख्यमंत्र्यांनाच या शेतकऱ्यांनी रस्त्यावरील अतिक्रमणाचा प्रश्न सोडवण्याची विनंती केल्याने स्थानिक प्रशासनात मात्र मोठी खळबळ उडाली आहे.