मानेगावच्या शेतकरीपुत्राची कमाल ! टाकाऊपासून बनवला फवारणी पंप

मानेगाव (सोलापूर) : माढा तालुक्‍यातील (Madha Taluka, Solapur) मानेगाव येथील शेतकरीपुत्र विश्वजित पाटील (Vishwajit Patil) याने टाकाऊपासून टिकाऊ असणारा संजीवनी फवारणी पंप (Sanjeevani spray pump) तयार केला असून, त्याचा लोकार्पण सोहळा मोहोळ कृषी विज्ञान केंद्राचे प्रमुख दिनेश क्षीरसागर (Dinesh Kshirsagar) यांच्या हस्ते पार पडला. या स्प्रे पंपाचे वैशिष्ट्य म्हणजे हा बाजारामध्ये चार हजार रुपये किमतीचा पंप असून, तो इथे फक्त तीनशे ते चारशे रुपयांमध्ये तयार होत आहे.

यासाठी पाच लिटरचा ड्रम, लहान चार्जिंग बॅटरी, खेळण्यातील मोटार, सलाईनची लांब नळी व पुढे छोटे फिरणारे चक्र एवढ्या साहित्यावरच हा पंप चालत आहे. त्यामुळे शेतकऱ्यांच्या पैशाची मोठी बचत होणार आहे. तर या पंपाला दिवसातून एक तास चार्जिंग केल्यानंतर हा पंप बारा तास पूर्णपणे चालतो. त्यामुळे शेतकऱ्यांना अतिशय परवडणारा असा हा फवारणी पंप असून सर्व शेतकरी बांधवांनी अशा पंपाचा उपयोग करून आपल्या शेतीमध्ये प्रगती करावी, असेही क्षीरसागरने सांगितले. या पंपाचे आणखी एक वैशिष्ट्य म्हणजे, या पंपामध्ये चार लिटर औषध बसते; मात्र चार लिटरमध्ये अर्धा एकर ते पाऊण एकर फवारणी सहज व सोप्या पद्धतीने करता येत आहे.

या वेळी राष्ट्रीय उद्योग आघाडीचे पोपट काळे, राष्ट्रीय प्रबोधनीचे अध्यक्ष शिवाजी पवार, शेतकरी संघटनेचे शिवाजी उबाळे, मारुती शिंदे, अमोल केसरे, कृषी सहाय्यक अनिल केदार, पंडित सांळुके, रवींद्र ताटे, भास्कर कदम आदी उपस्थित होते. या वेळी पोपट काळे व शिवाजी पवार यांनी शेतकऱ्यांना मार्गदर्शन करताना सांगितले, की नोकरीच्या मागे न लागता नवनवीन प्रयोग करून आपली प्रगती करावी. यातून वेळ व पैसा याची बचत होऊन नक्कीच तरुण शेतकऱ्यांसाठी मोठी संधी प्राप्त होणार आहे. या वेळी मोहोळ कृषी विज्ञान केंद्राच्या वतीने खरीप पीक यावर परिसंवाद घेण्यात आला. या वेळी मोठ्या संख्येने शेतकरी व ग्रामस्थ उपस्थित होते.