व्वा रे पठ्ठ्या! एकाच ATM सेंटरवर तीन ज्येष्ठांची फसवणूक; पैसे काढून देतो म्हणून ATM कार्ड बदलायचा, अन्‌

सोलापूर : डफरीन चौकातील ‘एसबीआय’च्या एटीएम सेंटरवर २६ मे ते ८ जून या १३ दिवसांत तिघांच्या ‘एटीएम’ची अदलाबदल ७४ हजार २०० रुपये लंपास करणाऱ्या तरुणाला सदर बझार पोलिसांनी जेरबंद केले आहे. सिद्राम वाघमारे (रा. मोदी) असे त्या संशयिताचे नाव आहे.

एकाच एटीएम सेंटरवर थांबून पैसे काढायला आलेल्या वयस्क व्यक्तींना हेरून त्यांना मदत करण्याचा बहाणा तो करायचा. ‘एटीएम’मध्ये कार्ड घालून तो त्या व्यक्तीला पासवर्ड टाकायला सांगत होता. त्यावेळी पासवर्ड लक्षात ठेवायचा आणि काही वेळाने पैसे निघत नाहीत म्हणून तो स्वत:कडील कार्ड त्यांना द्यायचा. पैसे काढायला आलेल्या व्यक्तीचे एटीएमकार्ड स्वत:कडे ठेवून घ्यायचा. त्याचवेळी तो संबंधित व्यक्तीला दुसऱ्या ‘एटीएम’मध्ये जायला सांगून तेथून पसार व्हायचा.

२६ मे रोजी दुपारी १२ ते एकच्या दरम्यान आपल्या ‘एटीएम’ कार्डची अदलाबदल करून दुसरेच कार्ड हाती सोपविल्याची फिर्याद वर्षा बाळासाहेब शिंदे (वय ६७, रा. न्यू लक्ष्मी चाळ, देगाव रोड) यांनी सदर बझार पोलिसांत दिली. त्यांच्या बॅंक खात्यातून ११ हजार २०० रुपये लंपास झाले होते. या गुन्ह्याचा तपास सुरु असतानाच ३१ मे रोजी तात्यासाहेब दामोदर जमदाडे (वय ६०, रा. वडाळा, ता. उत्तर सोलापूर) यांचीही फसवणूक झाल्याचा गुन्हा सदर बझार पोलिसांत दाखल झाला. त्यांच्या बॅंक खात्यातील ४७ हजार १०० रुपये लंपास झाले होते.

अजून संशयिताचा शोध लागलेला नव्हता, पोलिसांकडून डफरीन चौकातील एटीएम केंद्रावर वॉच होता. तरीपण ६ जूनला बबिता शिवाजी गावडे (वय ४३, रा. एनजी मिल चाळ, मुरारजी पेठ) यांचीही त्याच एटीएमवर फसवणूक झाली. आपल्या बॅंक खात्यातून १५ हजार ९०० रुपये लंपास झाल्याची फिर्याद सदर बझार पोलिसांत दाखल झाली. त्यानंतर पोलिसांनी तपासाची चक्रे फिरवली आणि संशयिताला जेरबंद केले.

संशयिताच्या डोक्यावर टोपी अन्‌ डोळ्यावर गॉगल

तात्यासाहेब जमदाडे, बबिता गावडे व वर्षा शिंदे यांनी सदर बझार पोलिसांत फिर्याद दिल्यानंतर पोलिस उपनिरीक्षक सचिन माळी यांनी संशयिताचे वर्णन विचारले. त्यावेळी तिघांनीही सांगितले, त्याच्या डोक्यावर टोपी व डोळ्यावर गॉगल होता. पोलिसांनी डफरीन चौकातील त्या एटीएमवरील सीसीटीव्ही फुटेज पडताळले. त्यानंतर मागील दोन दिवसांपूर्वी त्याला जेरबंद केले. सध्या सिद्राम वाघमारे हा संशयित पोलिस कोठडीत असून पोलिस कसून तपास करीत आहेत.