सांगली : महापालिका क्षेत्रात 6 ते 18 वयोगटांतील शालाबाह्य बालकांचे सर्वेक्षण सुरू झाले आहे. दहा दिवस हा सर्व्हे करण्यात येणार आहे. अनियमित व स्थलांतरित मुलांना शाळेच्या प्रवाहात दाखल करण्यासाठी विशेष शोध मोहीम महापालिका क्षेत्रात व्यापक स्वरुपात राबविण्यात येत आहे, अशी माहिती आयुक्त नितीन कापडणीस यांनी दिली.
आयुक्त कापडणीस म्हणाले,"कोविड -19 च्या महामारीमुळे शाळा बंद होऊन विद्यार्थ्यांच्या नियमित शिक्षणामध्ये अडथळा निर्माण झाला आहे. यामुळे नियमित शिक्षणातील बालकांना खूप आव्हानांना सामोरे जावे लागत आहे. ही बालके शालाबाह्य होऊ नयेत आणि विशेषत: या परिस्थितीत दिव्यांग मुलांबाबतची आव्हाने अधिक वाढू नयेत यासाठी 100 टक्के बालकांना शाळेच्या प्रवाहात दाखल करून त्यांच्या शिक्षणाच्या हक्कांची पूर्तता करणे ही सर्वोच्च प्राधान्याची गरज आहे. त्यामुळे शासन निर्णयाप्रमाणे महापालिका क्षेत्रात शोध मोहीम सुरू आहे.
या सर्वेक्षणात महापालिकेच्या प्रत्येक वॉर्डासाठी दोन असे एकूण 40 नियंत्रण अधिकारी नेमण्यात आले आहेत. प्रत्येक शाळेने शाळा परिसरात आणि वॉर्डातील नेमून देण्यात आलेल्या व्यक्तीने भागातील सर्व कुटुंबांचे सर्वेक्षण करावे. एकही बालक आपल्या परिसरामध्ये शालाबाह्य राहणार नाही याची खबरदारी घ्यावी.
या मोहिमेस सर्व नागरिकांनी त्यांच्याकडे येणाऱ्या शिक्षकांना योग्य प्रकारे माहिती देऊन कुटुंबप्रमुखाचे नांव व शालाबाह्य बालक असल्यास त्याची सविस्तर माहिती द्यावी, असे आवाहन शोध मोहीम समितीचे अध्यक्ष आयुक्त नितीन कापडणीस, उपायुक्त स्मृती पाटील व सदस्य सचिव प्रशासन अधिकारी हणमंत बिराजदार यांनी केले आहे.
संपादन- अर्चना बनगे
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.