"थर्टी फर्स्ट'ला जिल्हा परिषदेत नवा अध्यक्ष

नगर ः जिल्ह्यातील राजकीय वर्तुळाचे लक्ष लागलेल्या जिल्हा परिषद अध्यक्ष- उपाध्यक्षपदाच्या निवडीचा कार्यक्रम जिल्हाधिकारी राहुल द्विवेदी यांनी जाहीर केला आहे. ही निवडणूक येत्या 31 डिसेंबर रोजी होणार आहे. या निवडणुकीतून जिल्हा परिषदेला नूतन अध्यक्ष-उपाध्यक्ष मिळणार आहेत. या संदर्भात उद्या (ता. 21) नोटीस जारी होणार आहे. 

अध्यक्ष व उपाध्यक्षपदाच्या निवडणुकीचा कार्यक्रम कधी जाहीर होतो याकडे सर्वांचे लक्ष लागले होते. 
या निवडणुकीत उपजिल्हाधिकारी ऊर्मिला पाटील सहायक निवडणूक निर्णय अधिकारी असतील. स्थानिक स्वराज्य संस्थेमध्ये जिल्हा परिषदेचे स्थान महत्त्वपूर्ण मानले जाते. पंचायतराज व्यवस्थेत महत्त्वाची संस्था म्हणून जिल्हा परिषदेची ओळख आहे. जिल्हा परिषदेच्या विद्यमान अध्यक्ष शालिनी विखे पाटील व उपाध्यक्ष राजश्री घुले यांची पहिली टर्म संपली आहे. 

हेही वाचा ः श्राद्धासाठी जमलेल्यांवर मधमाश्यांचा हल्ला

पुढील टर्मसाठी ग्रामविकास विभागाने सोडतीद्वारे अध्यक्षपदाचे आरक्षण जाहीर केले. त्यात जिल्हा परिषद अध्यक्षपद सर्वसाधारण महिला प्रवर्गासाठी निघाले. 31 डिसेंबर रोजी जिल्हाधिकारी तथा निवडणूक निर्णय अधिकारी राहुल द्विवेदी यांच्या निगराणीत अध्यक्ष- उपाध्यक्षांची निवडणूकप्रक्रिया जिल्हा परिषदेच्या छत्रपती शिवाजी महाराज सभागृहात पार पडणार आहे. 

हेही वाचा ः  राळेगणसिद्धीत अण्णांचे मौन सुरू 

दरम्यान निवडणूक प्रक्रिया होईपर्यंत हंगामी अध्यक्ष म्हणून शालिनी विखे पाटील यांच्याकडे पदभार राहणार आहे. या कार्यकाळात धोरणात्मक निर्णय घेता येणार नाहीत. 

असा आहे 31 डिसेंबरचा कार्यक्रम 

अर्ज दाखल करण्याची मुदत ः सकाळी 11 ते दुपारी 1 
छाननी, माघार आवश्‍यकता असल्यास निवडणूक ः दुपारी 3 

नववर्षात सभापतींच्या निवडी 

नवीवर्षाच्या पूर्वसंध्येला जिल्हा परिषदेच्या अध्यक्ष व उपाध्यक्ष यांची निवड होणार आहे. त्यानंतर जिल्हा परिषदेच्या विषय समितीच्या सभापतींची व समित्यांच्या निवडी नवीन वर्षात होणार आहेत.