धक्कादायक ! मिरज सिव्हीलमधील तीन रूग्णांना फेकले रस्त्यावर

सांगली - मिरजेच्या सिव्हील हॉस्पिटलमध्ये दाखल असलेल्या तीन रूग्णांवर उपचार न करता सांगलीत निर्जन रस्त्यावर आणून फेकून दिल्याचा प्रकार घडला. या तीन रूग्णांना नंतर सांगलीतील सिव्हील हॉस्पिटलमध्ये उपचारास दाखल करण्यात आले. पण त्यापैकी एकाचा मृत्यू झाला. शिवलिंग कुचनुरे (रा. गणेशवाडी, ता. शिरोळ) असे मृताचे नाव आहे. त्यामुळे वैद्यकीय पंढरीत खळबळ उडाली आहे.

मृत्यूस कारणीभूत असलेल्या डॉक्‍टर आणि कर्मचाऱ्यांवर सदोष मनुष्यवधाचा गुन्हा दाखल करावा, अशी मागणी शिवसेनेने अधिष्ठातांकडे केली आहे.

याबाबत अधिक माहिती अशी, सांगलीतील जुना कुपवाड रस्त्यावर सुंदर पार्क या निर्जन रस्त्यावर तीन मृतदेह आणून टाकल्याची अफवा दोन नोव्हेंबरला रात्री दहाच्या सुमारास पसरली होती. त्यामुळे जागरूक नागरिकांनी तिकडे धाव घेतली. तेव्हा तिघेजण रूग्ण जीवंत असून उपचाराअभावी निपचिप पडल्याचे निदर्शनास आले. त्यापैकी एका रूग्णाने धक्कादायक माहिती सांगितली.

तिन्ही रूग्णांना डिसचार्ज देऊन दुसऱ्या हॉस्पिटलमध्ये नेत असल्याचे सांगून मिरज सिव्हीलमधून बाहेर काढले. त्यानंतर सांगलीत निर्जन रस्त्यावर आणून त्यांना फेकले. प्रतिकार शक्ती नसलेले तिन्ही रूग्ण रस्त्यावर पडून राहिले, तर कुत्री हल्ला करण्याचा धोका होता. त्यामुळे नागरिकांनी संजयनगर पोलिसात या प्रकाराची माहिती दिली.  त्यानंतर सामाजिक कार्यकर्ते मुस्तफा मुजावर यांच्या मदतीने त्यांच्याच गाडीतून रात्री अकराच्या सुमारास तिघांना सिव्हीलमध्ये उपचारास दाखल केले. तिघेही रूग्ण गंभीर होते. त्यापैकी शिवलिंग कुचनुरे यांचा आज मृत्यू झाला.

दरम्यान मिरज सिव्हीलने फेकून दिलेल्या तीन रूग्णांपैकी एका रूग्णाचा मृत्यू झाल्याच्या घटनेने वैद्यकीय पंढरीत खळबळ उडाली आहे. वैद्यकीय पंढरीला काळिमा फासल्या गेल्याच्या घटनेने संताप व्यक्त होत आहे. शिवसेना उपजिल्हाप्रमुख शंभोराज काटकर आणि कार्यकर्त्यांनी तातडीने सिव्हीलमध्ये
धाव घेतली. अधिष्ठाता यांना याप्रकरणी निवेदन दिले आहे. मिरजेतील संबंधित विभाग प्रमुख, डॉक्‍टर आणि कर्मचारी यांना तातडीने नोकरीतून बडतर्फ करावे. त्यांच्यावर सदोष मनुष्यवधाचा गुन्हा दाखल करावा, अशी मागणी केली आहे.

इन कॅमेरा शवविच्छेदन करा -

मृत शिवलिंग कुचनुरे यांच्या मृत्यूनंतर शवविच्छेदन इन कॅमेरा करण्यात यावे, अशी मागणी शिवसेना उपजिल्हाप्रमुख काटकर यांनी केली आहे.