वॉशिंग मशिन दुरुस्तीच्या बहाण्याने बेशुद्ध करून दागिने लुटणाऱ्या दोघांना अटक

बेळगाव : वॉशिंग मशिन दुरुस्तीच्या बहाण्याने घरात प्रवेश करीत घरमालकांना बेशुद्ध करून त्यांच्या अंगावरील दागिने पळविणाऱ्या दोन लुटारूंना आज अटक करण्यात आली. टिळकवाडी पोलिसांनी ही कारवाई केली असून, संशयितांकडून सुमारे तीन लाख २७ हजार रुपयांचा मुद्देमाल जप्त केला. मारुती परशराम जाधव (वय २८, रा. विशाल गल्ली, कंग्राळी खुर्द) आणि शुभम राजू बळसिद (२५, रा. वैभवनगर) अशी अटकेतील संशयितांची नावे आहेत.

याबाबत पोलिसांतून मिळालेली अधिक माहिती अशी, की

३० नोव्हेंबरला शोभा गुरुराव काथवटे (रा. शिवाजी कॉलनी, टिळकवाडी) यांच्या घरी दोन तरुण वॉशिंग मशिन 
दुरुस्तीच्या बहाण्याने आले होते. घरात प्रवेश केल्यानंतर त्यांनी शोभा यांचे तोंड दाबून मारहाण करत त्यांना बेशुध्द केले. त्यानंतर त्यांच्या गळ्यातील मंगळसूत्र, सोनसाखळी, सोन्याच्या बांगड्या लुटल्यानंतर शोभा यांचे पती गुरुराव यांनाही मारहाण करत बेशुध्द केले. त्यांच्याही गळ्यातील सोनसाखळी, अंगठ्या आणि २५ हजारांची रोकड असा एकूण ३ लाख ४५ हजार रुपयांचा मुद्देमाल लंपास करुन पलायन केले होते.

हेही वाचा- आगामी निवडणुकीच्या पार्श्वभूमीवर शिवसेनेकडून रणनीतीवर होतंय काम 

याप्रकरणी टिळकवाडी पोलिसात गुन्हा दाखल झाला होता. पोलिस निरीक्षक विनायक बडीगेर व सहकाऱ्यांनी शुक्रवारी वरील दोघा संशयितांना अटक करुन त्यांच्याकडून ३ लाख २० हजार रुपयांचे दागिने आणि सात हजार रुपयांची रोकड असा एकूण ३ लाख २७ हजार रुपयांचा मुद्देमाल जप्त केला.

संपादन- अर्चना बनगे