बसवराज बोम्मई यांच्या नेतृत्वाखाली संपूर्ण राज्याचा विकास करणार

खडकलाट ः मुख्यमंत्री बसवराज बोम्मई यांच्या नेतृत्वाखाली संपूर्ण राज्याचा विकास करणार आहोत. येत्या काळामध्ये सर्वच क्षेत्रात अमुलाग्र बदल घडवून राज्याला विकासाच्या वळणावर नेऊ. संपकाळात निलंबित केलेल्या कर्मचाऱय़ांना सामावून घेण्यास येईल. बेळगाव जिल्ह्यातील तालुक्यांना नव्या बसेस लवकरच देऊ, असे आश्वासन राज्याचे परिवहन व समाज कल्याण मंत्री श्रीरामलु यांनी दिले. शनिवारी (ता. २५) नवलिहाळ (ता. चिक्कोडी) येथे कर्नाटक राज्य वायव्य परिवहन महामंडळातर्फे ९ कोटी खर्चुन तयार होणाऱ्या स्वयंचलित वाहन प्रशिक्षण परीक्षा ट्रॅकच्या कोनशिला समारभांप्रसंगी मार्गदर्शन करताना ते बोलत होते. अध्यक्षस्थानी आमदार गणेश हुक्केरी होते.

मंत्री श्रीरामलु, आमदार गणेश हुक्केरी, बेळगाव जिल्हा परिवहन संचालक एम्. शोभा यांच्या हस्ते भूमिपूजन व कोनशिला अनावरण झाले. मंत्री श्रीरामलु म्हणाले, पाच एकरात हा ट्रॅक होत आहे. संगणकीकृत व स्वयंचलित यंत्रणेमुळे वाहन चालविण्याचा परवाना देताना कोणतीही चुक होणार नाही. त्यामुळे भविष्यकाळात यांचा फायदा होऊन अपघाताचे प्रमाण अत्यल्प होणार आहे. आमदार गणेश हुक्केरी म्हणाले, ट्रकअभावी याआधी अथणी, चिक्कोडी, हुक्केरी, रायबागमधील हुबळीला जावे लागत. या सेवेमुळे चांगली सोय होणार असून काम त्वरित पूर्ण करण्याची गरज आहे.

प्रादेशिक परिवहनच्या बेळगाव जिल्हा संचालिका एम्. शोभा यांनी स्वागत केले. कार्यक्रमास प्रादेशिक परिवहनचे हुब्बळी येथील कार्यकारी अभियंता एच्. एम्. नागराजमुर्ती, चिक्कोडीचे जे. पी. विशाल, नवलिहाळ ग्रा. पं. चे उपाध्यक्ष जयापगोळ, खडकलाट ग्रा. पं. उपाध्यक्ष कुमार पाटील, विजय पाटील, वासु गावडे यांच्यासह बेळगाव, चिक्कोडी प्रादेशिक परिवहन विभागातील अधिकारी व नागरिक उपस्थित होते. बसनाळगड्डे सरकारी हायस्कूलचे शिक्षक अलगोंडा सोलापूर यांनी सूत्रसंचालन केले‌. परिवहन अधिकारी शिवानंद मगदूम यांनी आभार मानले.