टेम्पो-दुचाकीच्या अपघातात बैलगाडा शौकीनाचा मृत्यू

तळेगाव स्टेशन - मावळातील नाणोली तर्फे चाकण येथील घाटावर आयोजित बैलगाडा शर्यत (Bullockcart Competition) पाहण्यासाठी आलेल्या शेटेवाडी येथील तीस वर्षीय तरुणाचा (Youth) दुचाकी घसरून टेम्पोच्या चाकाखाली सापडल्याने (Accient) दुर्दैवी मृत्यू (Death) झाला. हा अपघात इंदोरी ते नाणोली रस्त्यावर शनिवारी (ता.१२)  दुपारी एकच्या सुमारास झाला. अनिल प्रकाश शेटे (३०, शेटेवाडी, मावळ) असे मयत तरुणाचे नाव आहे. नाणोली येथे आयोजित बैलगाडा शर्यत पाहून अनिल हा आपल्या मित्राला भेटावयास चालला असताना रस्त्यावरील खडीवरुन त्याची दुचाकी घसरून तो टेम्पोच्या चाकाखाली सापडला.

जेमतेम आर्थिक परिस्थिती असलेल्या मयत अनिलच्या पश्चात आई, वडील, पत्नी, दोन छोटी मुले, भाऊ, बहीण असा परिवार आहे. याप्रकरणी टेम्पोचालक पंढरीनाथ प्रकाश फडके (२५, कान्हेफाटा, मावळ) याने तळेगाव एमआयडीसी पोलीस ठाण्यात दिलेल्या फिर्यादीवरून पोलीसांनी मोटार वाहन अपघाताचा गुन्हा दाखल केला आहे. टेम्पो चालक फडके हा चाकण एमआयडीसीतून तळेगाव एमआयडीसीत माल घेऊन जात असताना, दुचाकी घसरून मयत शेटे हा टेम्पोच्या चाकाखाली आला. पुढील तपास पोलीस हवालदार सचिन काचोळे करीत आहेत.