जुन्या भांडणावरून तिघांना बेदम मारहाण

पिंपरी : जुन्या भांडणावरून टोळक्याने तिघांना बेदम मारहाण केली. हा प्रकार फुगेवाडी येथे घडला. याप्रकरणी अजय शंकर जाधव (रा. फुगेवाडी) यांनी फिर्याद दिली आहे. त्यानुसार योगेश बापू आय्याळी, गणेश बापू आय्याळी (दोघेही रा. संजयनगर झोपडपट्टी, फुगेवाडी), उमेश पात्रे (रा. दापोडी) व इतर सहा जण यांच्यावर गुन्हा दाखल झाला आहे. आरोपी योगेश, गणेश व उमेश यांनी १८ मे २०२१ ला फिर्यादी यांचा भाचा कौशल याला मारहाण केली होती.

या भांडणाचा राग होता. तसेच आरोपी गणेश याच्या आईकडे फिर्यादी यांनी पानदुकानाच्या उधारीचे पैसे मागितले होते. याचाही राग होता. या कारणावरून बुधवारी (ता. ८) रात्री साडे अकराच्या सुमारास आरोपींनी फिर्यादी यांच्या घराजवळ जमाव जमवला. फिर्यादीला मारहाण करीत मारण्याची धमकी दिली व दगडफेक केली. या मारहाणीत फिर्यादीसह त्यांची पत्नी व पुतणी यांना दुखापत झाली. तसेच आरोपींनी फिर्यादी यांच्या दुचाकीची तोडफोड करून सात हजारांचे नुकसान केले. याप्रकरणी भोसरी पोलिस ठाण्यात गुन्हा दाखल असून पोलिस अधिक तपास करीत आहेत.