गुंठेवारी नियमितीकरणासाठी पाणी बिल, करभरणा पावती ग्राह्य

नियमितीकरणासाठी
अर्ज मागविले

पिंपरी, ता. ७ ः शहरात डिसेंबर २०२० पूर्वी झालेली गुंठेवारीतील बांधकामे नियमित करण्याची प्रक्रिया महापालिकेने सुरू केली आहे. त्यासाठी मिळकतधारकांकडून अर्ज मागविण्यात येत आहेत. त्यासोबत सादर करायच्या कागदपत्रांच्या अटीमध्ये महापालिकेने शिथिलता आणली आहे. त्यामुळे आता करसंकलन व पाणीपुरवठा विभागांच्या ना-हरकत दाखल्यांऐवजी मार्च २०२१ अखेर मिळकतकर व पाणी बिल भरणा पावती आणि व जलनिःसारण विभागाच्या ना-हरकत दाखल्याऐवजी ड्रेनेज कनेक्शन पूर्णत्वाचा दाखला ग्राह्य धरला जाणार आहे. गुंठेवारीतील बांधकामे नियमितीकरणासाठीचा अर्ज महापालिकेच्या www.pcmcindia.gov.in या संकेतस्थळावर ‘सर्वसाधारण माहिती अर्थात जनरल इन्फॉर्मेशनमध्ये उपलब्ध आहे, असे महापालिकेचे सहशहर अभियंता मकरंद निकम यांनी कळविले आहे.