प्रमुख पक्षाच्या तिकिटासाठी इच्छुकांची ‘फिल्डिंग’

भोसरी, ता.१५ : पिंपरी चिंचवड महापालिकेच्या निवडणुकीची घोषणा झाल्याने इच्छुकांनी गुडघ्याला बाशिंग बांधले आहे. प्रभावशील पक्षाचे तिकीट मिळविण्यासाठी इच्छुक बड्या नेत्यापर्यंत मजल मारण्याचा प्रयत्न करत आहेत. तर पक्षांद्वारे उमेदवारीसाठी ‘शब्द’ मिळत नसल्याने इच्छुकांची घालमेल वाढली आहे. पक्षाने तिकीट नाकारल्यास दुसऱ्या पक्षांमध्ये वर्णी लावण्याचाही प्रयत्न इच्छुकांद्वारे सुरू आहे.
मुदत संपल्यानंतर तब्बल तीन वर्षांनी पिंपरी चिंचवड महापालिकेची निवडणूक होत आहे. त्यामुळे ही निवडणूक माजी नगरसेवकांसह नव इच्छुकांसाठी महत्त्वपूर्ण ठरत आहे. काहीही झाले, तरी निवडणूक लढविण्याचाच चंग माजी नगरसेवकांसह इच्छुकांनी बांधला आहे. त्यामुळे सर्वच प्रमुख पक्षांकडे इच्छुकांची संख्या वाढती आहे.
प्रभागातील आरक्षण यापूर्वीच जाहीर झाले आहे. त्यामुळे प्रभागात कोणत्या संवर्गातील उमेदवार असणार, हे स्पष्ट झाल्याने या आरक्षणाप्रमाणे काही ठिकाणी माजी नगरसेवक आणि इच्छुकांनी पत्नीला निवडणूक रिंगणात उतरविण्याचा प्रयत्न सुरू ठेवला आहे. प्रभागात तशा आशयाचे फलक, फ्लेक्सही झळकत आहेत. प्रत्येक प्रभागात इच्छुकांची वाढती संख्या आहे. निवडणुकीच्या अंतिम यादीपर्यंत ही संख्या अशीच राहिल्यास निवडणूक विभागाला ‘इव्हीएम’ची संख्या वाढवावी लागणार आहे. त्यामुळे निवडणूक विभागाचीही डोकेदुखी होणार असल्याचे चिन्ह निर्माण झाले आहे.
निवडणुकीत पक्षांद्वारे कोणाला तिकीट मिळणार, याकडेही इच्छुकांनी लक्ष ठेवले आहे. कार्यरत असलेल्या पक्षांकडून तिकीट मिळाले नाही, तर इतर पक्षांतून तिकीट मिळविण्यासाठी हालचाली सुरू आहेत. प्रमुख पक्षांकडे निवडणुकीसाठी इच्छुकांची वाढती संख्या असल्याने कोणत्या उमेदवारांना तिकीट द्यावे, असा प्रश्न पक्षांच्या पदाधिकाऱ्यांसमोर आहे. त्यामुळे हे पदाधिकारी इच्छुक उमेदवारांना भेटेनासे झाल्याचे चित्र भोसरी परिसरात आहेत. इच्छुकांदवारे पदाधिकाऱ्यांचे नातेवाईक तसेच जवळच्या व्यक्तींशीही संपर्क साधण्याचा प्रयत्न होत आहे. मात्र, प्रतिसाद मिळत नसल्याने इच्छुकांची धाकधूक वाढली आहे.

तिकीट नाकारल्यास उड्या मारण्याची भीती
पक्षांकडे वाढत्या उमेदवारांची संख्या पाहता, आताच कोणत्याही उमेदवाराला पक्षाचे तिकीट देण्यासाठीचा शब्द देणे पदाधिकाऱ्यांद्वारे टाळले जात आहे. पक्षाच्या उमेदवाराचे तिकीट मिळणार नसल्याचे स्पष्ट झाल्यावर उमेदवार इतर पक्षांमध्ये उड्या मारतील, याचीही भीती या पदाधिकाऱ्यांना आहे. त्याचप्रमाणे पक्षाद्वारे स्पष्ट शब्द देण्यात येत नसल्याने इच्छुकांना बॅनर छापणे, प्रचाराची पत्रके छापणे, चिन्हांसह उमेदवारीची जाहीरात करणे या गोष्टी करता येत नसल्याने ‘कोणता झेंडा घेऊ हाती’ अशी इच्छुकांची अवस्था झाली आहे.

पक्षाच्या भूमिकेकडेही लक्ष
सर्वच प्रमुख पक्षांनी आपल्या कार्यकर्त्यांना निवडणुकीत न्याय देण्यासाठी पिंपरी चिंचवड महापालिकेची निवडणूक स्वतंत्रपणे लढणार असल्याचे संकेत दिले आहेत. मात्र, काही महापालिकेत महायुती, महाआघाडी एकत्रित निवडणूक लढणार असल्याचे पक्षाच्या राष्ट्रीय आणि राज्य स्तरांवरील महत्त्वाच्या नेत्यांनी जाहीर केले आहे. त्यामुळे ऐनवेळेस वरिष्ठ पातळीवरून महापालिकेच्या निवडणुकीसाठी कोणती भूमिका या नेत्यांद्वारे घेतली जाणार हे गुलदस्त्यात असल्यानेही इच्छुकांमध्ये संभ्रमावस्था आहे.