हेरिटेज प्लाझा संकुलाचे ‘फायर ऑडिट’ होणार

चिंचवड, ता.३० ः चिंचवडगाव येथील एल्प्रो मॉलजवळील हेरिटेज प्लाझा या व्यावसायिक संकुलाने सिलिंडरचा वापर केला जात असलेल्या व्यावसायिक दुकानदारांना आग शमविण्यासाठी अग्निशामक उपकरणे ठेवणे बंधनकारक केले आहे तसेच संपूर्ण सोसायटीचे देखील ‘फायर ऑडिट’ करण्याचे ठरविले आहे.
या संकुलाच्या तळमजल्यावरील ‘चारकोल क्लाऊड किचन’ या अन्ननिर्मिती केंद्राला सोमवारी रात्री ८ वाजण्याच्या सुमारास भीषण आग लागली. सुदैवाने कोणतीही जीवितहानी झाली नाही. आग लागल्याच्यावेळी दुकानात दोन कर्मचारी उपस्थित होते. प्रसंगावधान राखून त्यांनी तातडीने बाहेर धाव घेतल्याने जीव वाचले. आगीची माहिती मिळताच अग्निशामक दलाचे बंब तातडीने घटनास्थळी दाखल होऊन आग आटोक्यात आणली. मात्र, दुकानातील संपूर्ण साहित्य जळून खाक झाले. विशेष म्हणजे याआधीही याच दुकानात आग लागण्याची घटना घडली होती. त्यामुळे संकुलाने वरील निर्णय घेतला आहे.

या दुकानाला शॉर्टसर्किटमुळे आग लागलेली होती. हे दुकान रात्री उशिरापर्यंत म्हणजे पहाटे ३ पर्यंत चालू असायचे. त्यामुळे यापुढे अशा प्रकारची दुकाने रात्री ११ पर्यंतच चालू ठेवणे, जेथे सिलिंडर गॅसचा वापर होतोय. तेथे अग्निशामक उपकरणे ठेवणे बंधनकारक केले आहे. तसेच संपूर्ण संकुलाचे देखील फायर ऑडिट केले जाईल.
- जोसेफ रॉड्रिक्स, सचिव, हेरिटेज प्लाझा सोसायटी